کورنيو چارو وزارت وايي، چې تېره شپه د کابل ښار د یوولسمې امنیتي حوزې اړوند د ۳۱۵ سیمې په مربوطاتو کې، د شرطې ځانګړو ځواکونو له لوري درې تنه مسلح غله د متقابلو ډزو په پایله کې وژل شوي دي.
د لومړنیو معلوماتو له مخې، یادو درېیو تنو مسلحو غلو شاوخوا درې اوونۍ وړاندې د کابل ښار د لیسه مریم په سیمه کې د افغان یونایتد بانک پر موټر برید کړی و، چې په پایله کې یې د یاد بانک دوه تنه کارکوونکي وژلي او یوه اندازه پیسې یې له ځان سره وړې وې.
د معلوماتو له مخې، یادو کسانو د نورو وژنو او بېلابېلو جرمي کړنو په ترسره کولو کې هم لاس درلود.
کورنیو چارو وزارت وایي د لومړنیو کشفي معلوماتو پر بنسټ، چې د بغلان ولایت په مربوطاتو کې د نورجان، چې په طیب مشهور و، د شهادت په پېښه کې هم د یادې ډلې لاس درلود.
د یادونې وړ ده چې د نورجان (طیب) اړوند موټر هم د یادو غلو له لوري له ځان سره وړل شوی و، چې د عملیاتو په ترڅ کې د امنیتي ځواکونو لاس ته ورغلی دی.


