د رياستالوزراء مقام د دفتر لوی رئيس ډاکټر عبدالواسع د امارتي ادارو د يو کلنو لاسته راوړنو د تشريح پروګرام په پرانيست غونډه کې ویلي، چې سرپرست حکومت په داسې حال کې واک ته ورسېد، چې افغانستان له ګڼو امنیتي، اقتصادي، ټولنیزو او کلتوري ستونزو سره مخ وو، خو نن په بېلابېلو برخو کې ګڼ پرمختګونه او ښې لاسته راوړنې لري.
د نوموړي په وینا، د سرپرست حکومت د رهبرۍ او مسؤلینو د ژمنتیا، اخلاص او مدبرانه هڅو له برکته، له موجوده امکاناتو څخه په ګټې اخیستنې، د هېواد په بېلابېلو برخو کې مهم او مثبت بدلونونه او اصلاحات رامنځته شوي.
نوموړي زیاته کړې، چې د همدې اصلاحاتو په پایله کې، نن امارتي ادارې په مرکز او ولایتونو کې خپلې چارې په منظمه توګه پرمخ وړي، اړمنو ته خدمات رسوي، چارې په روڼتیا ترسره کېږي او د سیمهییزې او مرکزي ادارې ترمنځ همغږي ورځ تر بلې پیاوړې کېږي.
نوموړي همداراز ویلي، چې د دې پروګرام موخه دا ده، چې ولس د خپل نظام له کړنو خبر او مسئولين د خپلو فعاليتونو راپور په شفاف ډول له ولس سره شريک کړي.
د حکومت د رسنیو مرکز ویلي، چې «د امارتي ادارو د يو کلنو لاسته راوړنو د تشريح پروګرام» کې شاوخوا ۴۵ وزارتونه او مستقلې ادارې خپل کلني راپورونه او لاسته راوړنې له رسنیو سره شریکوي او دا برنامه به یوه میاشت دوام ولري.