شر او فساد جبهه چې لسیزې یې د شمالي ټلوالې په عنوان پر مظلومو مسلمانانو بې شماره ظلمونه وکړل، د ټوټه کېدو پر خوا ګامونه اخلي؛ دا جبهه په خپل منځ کې د شته اختلافاتو له کبله چاودېدو او له منځه تللو ته نږدې شوې ده.
د هندوکشغږ د معلوماتو له مخې څو شپې وړاندې امر الله صالح، جنرال ایوب سالنګي، بهاوالدین جیلاني او ظاهر اغبر چې د شر او فساد جبهې مهم غړي شمېرل کېدل، له شر او فساد جبهې څخه په جلا کېدو سره د “زرغون بهیر” په چوکاټ کې د یوې بلي نظامي جبهې پر جوړولو لومړني توافقات ترسره کړي دي.
امر الله صالح چې له لسیزو را په دېخوا په استخباراتي چارو کې لوبېدلی شخصیت لري، زرغون بهیر یې په خپله مشري هغه حرکت دی چې د طالبانو په ضد یو شمېر جعلي اسناد خپروي او په بې بنسټه تبلیغاتو پیسې ترلاسه کوي؛ نوموړی له تاجکستان هېواد سره نږدې اړیکې لري او ډېری وخت هلته اوسېږي.
له شر او فساد جبهې د امر الله په ډول مهمو افرادو جلا کېدل، په جبهه کې د احمد مسعود پر مشرتابه د اختلاف ټکي قوي څرګندوي؛ ځکه چې امر الله د احمد شاه مسعود د ژوند پر مهال له تاجکستان سره د اړیکو برقراره کولو او استخباراتي برخه کې مسؤلیت درلود او د هغه یو له باور وړ افرادو څخه ؤ، مګر اوس احمد مسعود نه دی توانېدلی چې دوی پر ځان ور ټول کړي.
د طالبانو لخوا د کابل له نیولو سره، په تېرو دریو کلونو کې ګڼ شمېر سیاسي او نظامي جبهې له افغانستان بهر جوړ شوي او د بهرنیو هېوادونو د ملاتړ جلبولو هڅه کوي، خو تر دې مهاله هیڅ نظامي جبهه نه ده توانېدلې چې افغانستان ته د ستنېدلو لپاره باور پرې وشي.
د دغه جبهو مشران او غړي یې ډېری هغه افراد دي، چې د امريکايي اشغال پر مهال یې په درې ګونو امنیتي ارګانونو، مذاکراتي ټیمونو، امنیت شوری او نورو بنسټونو کې دندې اجرا کولې، خو له ټولو امکاناتو سره، سره ونه توانېدل په افغانستان کې سیکولر ارزښتونه تطبیق او ساتنه یې وکړي؛ خو اوس بیا ځل د امکاناتو او نظامي جګړې غوښتنې کوي.