د کابل ښاروالۍ مسوولین وايي، د روژې مبارکې میاشتې په خاطر د نرخونو کنترول او له احتکار څخه د مخنیوي کمېسیون چې د بېلابېلو ادارو استازي پکې برخه لري په بازارونو کې د لومړنیو خوراکي توکو له نرخونو څخه څارنه کوي.
له کابل ښاروالۍ څخه په خپره شوې خبرپاڼه کې ویل شوي، یاد کمېسیون د خپلې څارنې پر مهال یو شمېر سرغړوونکو ته له تادیب سربېره اړینې سپارښتنې کړې.
د خبرپاڼې له مخې، له هټیوالو غوښتنه وشوه چې د پلورلو پرمهال انصاف په پام کې ونیسي او خپل توکي د کابل ښاروالۍ د نرخپاڼې مطابق وپلوري. ښاريان به د ښاري ژوند د قانوني کېدو په موخه، د نرخپاڼې د تطبیق او دودولو په برخه کې د کابل ښاروالۍ له مسوولينو سره مرسته وکړي.
په خبرپاڼه کې ویل شوي، ټولو هټیوالو ته ویل شوي چې نرخپاڼې داسې ځای وځړوي چې هر څوک یې وگوري او د هغه مطابق خپل توکي وپلوري، گنې له دې پرته به له قانوني چلند سره مخ شي چې بیا به د شکایت حق ونه لري. «د نرخونو د کنټرول او له احتکار څخه د مخنیوي کمېسیون د کابل ښاروالۍ، سوداگرۍ، مالیې او کورنیو چارو وزارتونو، استخباراتو، د افغانستان بانک، د سوداگرۍ او پانگونې د خونې او د بېلابېلو اصنافو له استازو څخه جوړشوی دی.»
په خبرپاڼه کې ویل شوي، یاد کمېسیون یوه نرخپاڼه چمتو کړې او د ښاریانو د اړتیا وړ لومړنیو توکو د نرخونو د کنترول په موخه، خپل فعالیتونه گړندي کړي تر څو ښاریان وکولی شي د روژې په مبارکه میاشت کې خپل د اړتیا وړ توکي په مناسبه بیه او لوړ کیفیت د کابل له بازارونو څخه تر لاسه کړي.
که څه هم کابل ښاروالۍ د نرخونو ته د جدي پام خبره کوي؛ خو کابل ښاریان وايي، هټیوال لا هم په لوړه بیه خوراکي توکي پلوري.
