د کابل ښاروالۍ مسوولین وايي، د کابل ښار تلپاتې ودې لپاره له پرمختللو معیارونو سره سم په پلاني د غیر پلاني سیمو بدلولو او کور موندنې په موخه د کابل ښاروالۍ له لوري د اوولسمې ناحیې اړوند په نود فامیلیو سیمه کې د څه باندې ۲۷۷ مېلیونه افغانیو په لګښت د ښاري بیا پراختیا پروژې د لومړۍ برخې لومړني کارونه پیل شول.
د کابل ښاروالۍ څخه په خپره شوې خبرپاڼه کې ویل شوي، د دې پروژې لومړۍ برخه په ۱۴۱۸ متر مربع ځمکه کې د لسو پوړونو په لرلو سره د دوه بلاکونو جوړول په بر کې نیسي چې لومړی پوړ یې سوداگریز او پاتې ۹ نور به یې استوگنیز وي.: «په دې دوه بلاکونو کې ۱۰۸ استوگنیز آپارتمانونه، هټۍ او لوی پلورنځي هم په نظر کې نیول شوي دي.»
د خبرپاڼې له مخې، په دې پروژه کې د زرغونو سیمو، پلو لارو، پارکینگونو او نوورو بنسټیزو اړتیاوو جوړول هم شامل دي.:«د پروژو د پلې کولو په موخه د ځمکې د استملاک لپاره له پرمختللو او نوو کړنلارو(د ځمکې بیا پراختیا او تنظیم) څخه د کابل ښار د تلپاتې ودې او پراختیا لپاره کار اخلي.»
د یادونې وړ ده چې کابل ښاروالي پلان لري ترڅو د دې پروژې د دویمې برخې چارې هم د تخنیکي اسنادو او تدارکاتي پړاوونو تر بشپړېدو وروسته په راتلونکې کې پیل کړي.
د یو بل خبر له مخې، د کابل ښاروالۍ له لوري د اوومې ناحیې اړوند د ده دانا له بازار څخه تر پډولې سړک او چهلستون پورې د پل حسن سړک د جوړولو او پراختیا لومړنۍ چارې پیل شوې.: «دغه سړک چې ( ۱۳۴۸) متره اوږدوالی او (۳۰) متره سور لري، په دوه لیکو کې به د لښتیو، گلدانونو، د بایسکل چلولو لیکو او د یوه معیاري سړک د نورو برخو په گډون په روان کال کې په معیاري توگه جوړ شي.»
د یادونې وړ ده، اوس مهال د یاد سړک د جوړېدو په وړاندې د خنډونو له پاکولو سربېره، د خاورې لېږدولو او د لښتیو جوړولو چارې په عملي توگه روانې دي.