د ریاست الوزراء اقتصادي مرستیال ملا عبدالغني برادر اخوند له لوري نن په کابل کې د شاوخوا یو مېلیارد افغانیو په ارزښت د کابل ښاروالۍ درې مهمې پروژې پرانیستل شوې.
له اقتصادي معاونیت څخه په خپره شوې خبرپاڼه کې ویل شوي، په دغو پروژو کې د خیرخانې کوتل سړک دوهم لاټ، له شهید څلورلارې تر قصبې پورې د غځېدلي سړک لومړۍ برخه او د هوايي ډگر له څلور لارې بیا تر گمرک پورې د غځېدلي سړک جوړولو پروژې پرانیستل شوې. د یادو پروژو د پرانیستې په مراسمو کې ښاغلي برادر وویل، کابل ښاروالي د ښار د ښکلا او منظموالي په موخه ډېرې هڅې کوي چې د پخوا په پرتله د ښار بڼه منظمه شوې، موږ یې ټولې شوې هڅې ستایو او پر هېوادوالو غږ کوو چې د ټولگټو پروژو په ساتلو کې له حکومت سره همکاري وکړي.
نوموړي د کابل ښاروالۍ مسوولینو ته سپارښتنه وکړه، چې یادې پروژې په ټاکلي وخت او ښه کیفیت سره بشپړې کړي.یادې پروژې د خیرخانې کوتل سړک دوهم لاټ ۲۵۲۰ متره اوږدوالی او ۶۰ متره پلنوالی لري چې چارې به یې د ۳۶۴مېلیون افغانیو په لگښت سره په ۲۰ میاشتو کې بشپړې او گټې اخیستنې ته به وسپارل شي.
له شهید څلورلارې تر قصبې پورې د غځېدلي سړک د لومړۍ برخې پروژه ۱۸۹۰متره اوږدوالی او ۴۵متره پلنوالی لري، چې ټولټال پرې ۱۷۵مېلیونه افغانۍ لگښت او په یو کال کې گټې اخیستنې ته سپارل کېږي.
د هوايي ډگر له څلورلارې بیا تر گمرک پورې د غځېدلي سړک پروژه ۲۷۹۴متره اوږدوالی او ۶۰متره پلنوالی لري، چې ۴۰۷مېلیونه افغانۍ لگښت پرې راځي او ټاکل شوې چې په ۲۰ میاشتو کې به یې چارې بشپړې او گټې اخیستنې ته به وسپارل شي.
د یادونې وړ ده، دغه پروژې ویالې، پلې لارې، گلدانونه، برېښنا، تمځایونه، د سړک د سر خط کول، د ترافیکي نښو نصبول او د یوه معیاري سړک نورې برخې هم لري، چې مالي لگښت یې د کابل ښاروالۍ له لوري ورکول کېږي.