د کرنې، اوبو لګولو او مالدارۍ وزارت ویلي، چې د کرنیزې پراختیا وجهي صندوق «ADF» او د حاصل د کوچنیو تمویلونکو مؤسسو نوې ودانۍ د ۷۱.۲ میلیونه افغانیو په لګښت، چې ۲۴۰۰ متره مربع مساحت لري د کابل په بادامباغ کې جوړه او ګټې اخیستنې ته وسپارل شوه.
د کرنې وزیر مولوي عطاءالله عمري ویلي، چې د صندوق پراختیا به خلکو او د کرنې او مالدارۍ سکټور ته د لا ډېرو او غوره مالي خدمتونو د وړاندې کولو زمینه برابره کړي.
د صندوق رئیس انجنیر عبدالغفور غفاري ویلي، چې د افغان حکومت له بیا واکمنېدو راهیسې شاوخوا ۵۰۰ شرکتونو، کوپراتیفونو، تولیدوونکو، سوداګرو او نورو کرنیزو متشبثینو ته د اسلامي معاملاتو له لارې ۷.۵ میلیارده افغانۍ مالي تمویل ورکړل شوی دی.
د نوموړي په وینا، د دغه صندوق له مالي تمویلاتو زرګونه کسان برخمن شوي او نږدې ۱۲ زره کسانو ته یې د کار زمینه برابره کړې ده.