کاسا ۱۰۰۰ پروژه او افغانستان ته یې ګټې

محمد فیصل

پرون د ترکیې په استنبول کې د افغانستان، پاکستان، تاجکستان او قرغزستان د استازو تر منځ د کاسا ۱۰۰۰ پروژې د بیا پیل تړون لاسلیک شو.

د افغانستان برېښنا شرکت وایي چې شاوخوا یوه میاشت وروسته به د یادې پروژې چارې یو ځل بیا په افغانستان کې پیل شي او د ۱۴۰۴ کال پای کې به بشپړې شي.

کاسا په انګلیسي کې CASA ده چې مانا یې منځنۍ اسیا-سویلي اسیا ده.د کاسا پروژې له لارې د قرغزستان او تاجکستان ۱۳۰۰ میګا واټه برېښنا افغانستان او پاکستان ته لیږدول کیږي.

دغه پروژه باندې ۱.۲ میلیارده ډالر لګښت راځي چې نړیوال بانک یې ورکوي، د پروژې چارې په افغانستان کې د ۲۰۲۱ کال د تحول سره درېدلي وې، چې اوس بیا پیلیږي.افغانستان کې د پروژې یو څه برخه کارونه شوي چې راتلونکي شاوخوا دوه کلونو کې به یې پاتې چارې بشپړې شي.افغانستان ته د یادې پروژې ډیرې ګټې دي. لومړۍ دا چې یاده پروژه کې ۱۳۰۰ میګا واټه برېښنا لېږدول کیږي، چې ۳۰۰ میګا واټه یې افغانستان ته ورکول کیږي.

افغانستان دغه برېښنا په ډېر لږ قیمت ترلاسه کوي، چې له امله به یې افغان توکو قیمتونو کې ښه والی هم راشي.د ۳۰۰ میګا واټه برېښنا سره د افغانستان د برېښنا یو څه اړتیا هم پوره کیږي.

دویمه ګټه یې دا ده چې افغانستان د برېښنا د لېږد فیس هم ترلاسه کوي.درېیمه او ښایي تر ټولو مهمه یې دا ده چې دې پروژې سره سیمه ییز او په ځانګړي ډول د افغانستان ثبات یقیني کیږي.

افغانستان به د منځنۍ او سویلي اسیا تر منځ د وصل نقطه وي او د افغانستان له همکارۍ او ثبات پرته به د دې لویې پروژې پلي کیدل ممکن نه وي.دغه راز هیله مندي شته چې نږدې راتلونکي کې به د ټاپي پروژې چارې هم پیل شي.هند هم د هغې پروژې برخه ده او تمه شته چې د دغه ډول پروژو له پلي کیدو سره به سیمه ییز نښلون، همکاري او ثبات ډېر او سیمه به د لا نورې سوکالۍ په لور لاړه شي.