پنج شنبه/ د وري ۱۶ مه د کرنې، اوبو لګولو او مالدارۍ وزارت وایي، چې د امیرالمؤمنین حفظه الله د فرمان له مخې یې په لسو ولایتونو کې ۱۳۸ چک ډیمونه (د اوبو ذخیره کولو واړه بندون) جوړ کړي او ګټې اخیستنې ته سپارل شوي دي.
یاد وزارت ویلي، چې په دغو بندونو ۴۱۴ میلیونه افغانۍ لګښت راغلی او ګڼ شمېر هېوادوالو ته پکې د کار زمینه برابره شوې وه.
د دغه وزارت د معلوماتو له مخې دغه بندونه په ارزګان، کندهار، تخار، جوزجان، بدخشان، ننګرهار، لغمان، فاریاب، بامیان او دایکندي ولایتونو کې جوړ شوي، چې په وروستیو اورښتونو کې له اوبو ډک شوي هم دي.
د کرنې، اوبو لګولو او مالدارۍ وزارت وايي، چې دغه واړه بندونه د وچکالۍ زیانونو کمولو، سېلابونو مخنیوي، د موسمي اوبو مدیریت، د ځمکې لاندې اوبو د زېرمه کولو په موخه جوړ شوي دي.
یاد وزارت په داسې حال کې د یادو بندونو د جوړېدو خبر ورکوي، چې د امیر المؤمنین حفظه الله د ځانګړي فرمان له مخې د هېواد په ټولو ولسوالیو کې د اوبو ذخیره کولو واړه بندونه جوړیږي، چې په ډېرو ولایتونو کې بندونه جوړ شوي او په ځینو ولایتونو کې تر کار لاندې دي.
یو شمېر هېوادوال او بزګران د بندونو په جوړېدو خوښي ښي او وایي، چې له دې سره به د دوی ستونزې، چې د اوبو په برخه کې لري، تر ډېره حل او یا هم ختمې شي.