د کرنې، اوبو لگولو او مالدارۍ چارسمبالي وزیر عطاء الله عمري فاریاب ته د خپل سفر پر مهال ویلي، د خوراکي توکو خپلواکي، د سر خپلواکي، د روغتیا خپلواکي، د خوړو خوندیتوب، د اوبو مدیریت او د ځمکې مدیریت هغه بنسټیزې مسئلې دي، چې د هر هېواد پرمختگ په همدغو یادو موضوعاتو پورې اړه لري.
نوموړي ویلي، اوس د کار لپار زمینه برابره شوې، ستونزې نشته، امنیت ټینگ دی، خلک یو دي نو اړتیا ده، چې پخوانیو ستونزو ته د پای ټکی کېږدو.:«د ونو، ځنگلونو، څړځایونو او کرنیزو ځمکو څخه باید ساتنه وشي. خوراکي خوندیتوب او د ځان بسیاینې لپاره کار کول خورا اړین دي، باید کار وکړو ترڅو ځان بسیاینې ته ورسېږو، سالم او کیفیت لرونکي خواړه باید چمتو کړو، موږ د دوه دورې اشغال په مبارزه کې بریالي شو، اوس موږ د خپلې خاورې واکمن یو او کار ته اړتیا ده، له تاسو غواړم، چې په ټولو سیمو کې د کرنې کارکوونکو سره همکاري وکړئ.»
د ښاغلي عمري په خبره، په نظام جوړولو کې په پرېکنده هوډ ودرېږئ، عدالت وکړئ، انډولیز چوپړتیاوې وړاندې کړئ، دا خاوره درملنې ته اړتیا لري، دا خاوره ډېر ټپونه لري، د ځمکې د ستونزو د حل په پار باید د تصفیې په برخه کې کار وکړو، د امارت مشرتابه او موږ هوډ لرو چې کار وکړو نو وخت ته اړتیا ده، ترڅو دا هېواد ودان شي.
نوموړي همدا راز ژمنه کړې، چې اسلامي امارت د اوبو مدیریت ته ژمن دی او ډېر ژر به د هېواد اوبه مهار شي.