د کورنیو چارو وزارت وايي، په تېرو ۲۴ ساعتونو کې یې په نیمروز، بادغیس، غور، بغلان، خوست او فاریاب ولایتونو کې ۱۶ تنه د غلا، وژنې، بډو اخیستو او له کوره د تېښتې په تړاو نیولي دي.
له یاد وزارت څخه په خپره شوې خبرپاڼه کې ویل شوي، د نیول شوو له منځه، بادغیس کې څلور تنه د وژنې په تړاو، نیمروز کې څلور غله او یو تن د اداري فساد په تړاو، کاپیسا کې درې تنه د وژنې په تړاو، یو غل په غور، دوه تنه په بغلان کې له کوره د تېښتې په تړاو او یو تن په خوست کې د بډو اخیستو په تړاو نیول شوي دي. ورته مهال، ترهگرۍ سره د مبارزې پولیسو په فاریاب او غزني کې یو اندازه وسلې او مهمات موندلي او ضبط کړي دي.
د خبرپاڼې له مخې، نشهيي توکو سره د مبارزې پولیسو د هېواد په اتو ولایتونو کې ۲۷ تنه د نشهيي توکو د پلور او قاچاق په تړاو هم نیولي دي.: «یو تن په وريښمو بندر کې له څه باندې دوه کیلو شیشې سره، ۱۰ تنه په هرات، شپږ تنه په سمنگان، درې تنه په نیمروز، درې تنه غزني، دوه په بغلان او دوه تنه په سمنگان او جوزجان کې نیول شوي دي.»
د کورنیو چارو وزارت مسوولین وايي، د هېواد پولیس شپه ورځ کار کوي، څو په هېواد کې د جرمونو سلنه راکمه کړي او خلک په ارامۍ خپل ژوند پرمخ یوسي.