د کرنې، اوبولگولو او مالدارۍ وزارت وايي، په فراه کې د طبي بوټو د تشخیص، تثبیت او سروې چارې پیل شوې.
له یاد وزارت څخه په خپره شوې خبرپاڼه کې ویل شوي، د فراه د کرنې ریاست له لوري د ارزښت لرونکو طبي بوټو د تشخیص، تثبیت او سروې چارې پیل شوي دي.
د خبرپاڼې له مخې، د دې سروې چارې د فراه ولایت په پينځو ولسوالیو « شیب کوه قلعه کاه، اناردره، خاکسفید، گلستان او فراهرود»کې پیل شوې، چې په ترڅ کې یې د ارزښت لرونکو او طبي بوټو ځمکې او سیمې تشخیص او تثبیت وروسته په نښه شوې
دې سروې په لړ کې د انجې، اورشي، استغ، او هغه کروندې چې په خپل سرې او طبیعي ډول په دښتې او غرنیو سیمو کې راشنه شوي دي د ښې ساتنې او پالنې په موخه تثبیتېږي.
د یادولو وړ ده، چې دغه طبي او ارزښت لرونکي بوټي به د کرنې وزارت د ځانگړې کړنلارې له مخې په مسلکي ډول د تدارکاتي پروسې له لارې په قرارداد ورکول کېږي او په سیمه کې به هېچاته په خپل سرې توگه ورڅخه د گټې اخستنې اجازه ورنهکړل شي.
افغانستان گڼ شمېر طبي بوټي لري، چې د نړۍ گڼو هېوادونو ته صادرېږي او هغوی یې په طبي درملو کې کاروي.