د ریاست الوزرا اداري مرستیال عبدالسلام حنفي د افغانستان لپاره د ملگرو ملتونو د ځانگړې استازې مرستیال اندریکا راتوت سره لیدلي دي.
له ارگ څخه په خپره شوې خبرپاڼه کې ویل شوي، په دغه لیدنه کې اندریکا راتوت له افغانانو په ځانگړي ډول د هرات له زلزلهځپلو او له بېلابېلو هېوادونو څخه راستانه شوو کډوالو ته د بشري مرستو د وېش په برخه کې د افغانستان اسلامي امارت د همکاریو د مننې ترڅنگ د سراسري امنیت، د نشهيي توکو د قاچاق مخنیوی، سوداگرۍ او د اداري فساد د مخنیوي هرکلی کړی.: «له افغانانو سره د نړیوالې ټولنې مرستې به روانې وي او د افغانستان اسلامي امارت مسوولینو څخه غواړو چې مستحقو افغانانو ته د دې مرستو په رسولو کې همکاري وکړي.»
اندریکا تورات ویلي، د گاونډیو هېوادونو له لوري په زور د کډوالو ایستل د کډوالۍ د نړیوالو قوانینو خلاف کار دی او د افغانستان گاونډي هېوادونه باید دغه لړۍ ودروي.
د ریاست الوزرا اداري مرستیال عبدالسلام حنفي هم ویلي، له گاونډیو هېوادونو څخه په زور د افغان کډوالو رایستلو بهیر د ټولو نورمونو خلاف کړنه ده.
نوموړي نړیوالې ټولنې ته ډاډ ورکړی چې د بشري مرستو رسولو په برخه کې افغانستان اسلامي امارت د ټولو نړیوالو سازمانونو او مرسته کوونکو هېوادونو سره همکارۍ ته چمتو دی.