ليکوال: عبدالله زاهد
له کله نه چې امريکا افغانستان کې ماته سوې او د اسلامي امارت حاکميت کې افغانان د سولې، امن په نعمت نازول سوي؛ له همغه ورځې غرب د خپلې ماتې پټولو؛ د افغانستان د اسلامي امارت د دغې بريا د بدرنګه کولو او په سيمه کې واپس د غرب د ګټو د خونديتوب لپاره؛ غرب، اسرائيلو او فرانسې د داعش او شمالي ټلوالې ملاتړ ته ملا تړلې.
دا چې سيمه کې د غرب وفاداره چې همېش يې د غرب د ګټو د خونديتوب لپاره کار کړی هغه پاکستان دی؛ چې له جوړښت څخه تر ننه يې سيمه کې د غرب د ګټو د خونديتوب او د پيسو لپاره سيمه کې جګړې جوړې کړي.
اوس دغه د داعش او شمالي ټلوالې د پروژې عملي کولو چاري يې هم پاکستان پر غاړه اخيستې؛ هم يې د افغانستان اسلامي امارت سره مخالفت ته په رنګارنګ بهانو ملا تړلې؛ کله پر نړيوال سټيجونو باندې د افغانستان په نماينده ګي چپ و رد ږغېږي او کله بيا د ټي ټي پي د ساتلو په بهانه توغندۍ را غورځوي، تهمتونه تړي، کوم داعش چې دی يې روزي او افغانستان ته يې رالېږي هم يې پر نړيوال سټېج پر افغانانو تاوانوي تر څو بيا ځلي افغانستان کې جګړې شروع او د ده دکانداري پرمختګ وکړي.
دا ټولو ته څرګنده ده چې داعش او ټول مشران يې پاکستانيان دي، د آی ايس آی، پوځ په مېلمستونونو او پټنځايونو کې مېلمستياوې خوري؛ له پاکستان څخه افغانستان او نورو ملکونو ته ځي او هلته د غرب او پاکستان د ګټو لپاره لوبېږي.
دا چې غرب او ځيني نور مغرض هېوادونه د دوی ملاتړ کوي، دوی هېروي چې داعش يواځې افغانستان ته نه بلکې ايران، روسيې او د سيمې ټولو هېوادونو ته خطره ده؛ چې د دغې پروژې مخنيوی به بيا ډېر سخت وي، سيمه به ټوله خطر او جګړه کې واقع کړي.
د پاکستان استخباراتي ادارې (ISI) د شمالي ټلوالې او داعش تر منځ معاهدې او ناستې تر سره کوي؛ چې دوی به سيمه او افغانستان کې يو د بل سره مالي او تسليحاتي مرستې کوي؛ داعش به د شمالي ټلوالې په جامه کې هم کار کوي او د دوی په ټولۍ کې به ځان تر ايران او نورو ملکونو پوري هم رسوي؛ لکه روسيې ته چې تاجکستاني داعشيانو د شمالي ټلوالې په جامه او همکارۍ سره ځان رسولی او هلته يې بريد وکړ؛ همدغسي به د سيمې په نورو هېوادونو کې هم ډېر ژر را ښکاره سي، ځکه بايد نړۍ ژر تر ژره د داعش او شمالي ټلوالې له ملاتړه لاس واخلي که نه ټوله سيمه به مشکل سره مخ سي.
دا چې دوی يواځې اوس د طالبانو مخالفت ويني خو د طالبانو مقابل به دغه ډلې نه سي بريالۍ اما د سيمې نور ملکونو کې به ډېر رسوخ وکړي.
يوه خبره بايد ياد ولرئ چې د داعش پروژه اسراییل ځکه سپورټ کوي تر څو خپل سرسخته مخالف ايران ته سرخوږی جوړ کړي، شمالي ټلواله بيا د ايران سره د دوستۍ تارونه او ورته د جاسوسۍ پوخ ريکارډ لري؛ چې د داعش خراسان او شمالي ټلوالې دغه دوستي به ايران او روسيې ته په ډېره سخته تمامه سي.
نړۍ بايد پر پاکستان فشار واچوي او د داعش و شمالي ټلوالې له ملاتړه يې را وګرځوي؛ خصوصاً ايران و روسيه او د سيمې ملکونه بايد دې بخش کې جدي اقدام وکړي او د افغانستان د اسلامي امارت سره د دوی د مخنيوي لپاره باید ګډ پلانونه ولري.