په نورستان کې د تش په نوم آزادۍ جبهې له وروستۍ سختې ماتې وروسته، د دې ډلې د قوماندانانو ترمنځ ژور اختلافات پیدا شوي او خپل منځي چلند یې تر بل هر وخت ډېر توند شوی دی، ځکه دوی پر خنجاني شک لري، چې په دې ماته کې یې لوی لاس دی او د غولول شويو کسانو پر سر یې معامله کړې ده.
په نورستان کې د تش په نوم آزادۍ(پاور بانک) جبهې د ټولو شومو پلانونو ناکامۍ د دغه جريان په منځ کې داسې بې باوري او انشعاب رامنځ ته کړی، چې د پوځي رژیم آی ايس آی یې په خپلو ټولو اوپراتیفي پلانونو کې له څرګندې شرميندګۍ سره مخ کړی او له همدې امله هڅه کوي چې د دغه اختلافاتو د زیاتېدو مخه ونيسي.
په آزادۍ جبهه کې د دغو مخ پر زیاتېدونکو اختلافاتو اصلي عاملین صفي الله محمدي او فضل ربي خنجاني دی؛ دوی چې په چترال کې د پاور بانک جبهې له خوا د آی ايس آی له ملاتړه د برخمنو غولول شويو کسانو مشري کوي، په کامدېش کې یې له ناکامۍ وروسته په خپلو منځونو کې د معاملې تورونه تبادله کړي، چې له امله یې په پلانونو کې جدي خنډونه رامنځته شوي دي.
بل پلو د پاور بانک جبهې يو بل قوماندان رحمت الله قادري هم حاشیې ته شوی دی، هغه چې په جبهه کې د اختلافاتو اصلي سرچینه ده، په ډله کې دننه یې خپله جايګاه او باور بایللی. قادري مخکې په ډله کې ډېر رول درلود، خو اوس د ناکامو برنامو، شخصي ستونزو او يو لړ نورو ستونزو له امله ناراض شوی دی.
دغو اختلافاتو او خپل منځي تورونو د تش په نوم آزادۍ جبهې عملیاتي تحرکات تقریباً فلج کړي دي، چې له امله یې د پوځي رژیم استخباراتي ادارې اړ شوې دي، څو د دوی په منځ کې مداخله وکړي او را ولاړې شوې ستونزې په يو ډول حل کړي، ځکه دغه ادارې وېره لري چې پانګونه یې بې ځايه ده او هغه موخې چې ورسپارل شوې وې، نه دي ترلاسه کړي.
خو دا به محال وي چې د دوی ترمنځ شته اختلافات په اسانۍ حل او بيا د افغان حکومت د قاطع دريځ په وړاندې خپل مخالفت ته دوام ورکړي. دغسې مخالفتونه او جګړې چې موخې یې پرديو ورکړې وي او د ډلې دننه خپل هیڅ داخلي موخې او برنامه نه لري، ناکامي یې حتمي ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.