د کرنې، اوبولگولو او مالدارۍ وزارت وايي، د دغه ولایت د ځمکو د غصب مخنیوي او د غصب شوو ځمکو د بېرته راگرځولو کمېټې له لوري د هلمند په گرمسېر کې لسگونه جریبه ځمکه له غصب څخه خلاصه شوې ده.
یاد وزارت ویلي، د دولتي ځمکو د غصب مخنیوی د کرنې، اوبولگولو او مالدارۍ وزارت له لومړیتوبونو څخه دی، چې ټولې غصب شوې ځمکې د چارواکو له تایید او حکم وروسته بېرته راگرځول کېږي.
له بل لوري د هلمند پېښو سره د مبارزې ریاست وايي، د کډوالو نړیوال سازمان سره په گډه همکاري یې د یاد ولایت په گرشک ولسوالۍ کې د وروستیو سېلابونو له امله زیانمنو ۱۱۰ کورنیو سره د غیرخوراکي توکو مرسته کړې ده.
یاد ریاست ویلي، په دې مرستو کې هرې کورنۍ ته کمپلې، د پخلنځي توکي، سولري کېټ، پلاستیکي فرش، ژمنۍ جامې او هغو کورنیو ته چې کورونه یې په بشپړډول ویجاړ شوي وو، هرې کورنۍ ته ۱ باب خیمه ووېشل شوه.
د وروستیو ورښتونو او سېلابونو له امله په هېواد لسگونه کسانو ته ځاني او مالي زیانونه اوښتي دي او زرگونه جریبه کرنیزه ځمکه یې هم وړې ده.