د اوبو او انرژۍ وزارت مسوولین وايي، د دغه وزارت مرستیال حمدالله زاهد د چین (جې، اې، ډې، ای) شرکت له مسوولینو سره لیدلي دي.
له یاد وزارت څخه په خپره شوې خبرپاڼه کې ویل شوي، په دې لیدنه کې د یاد شرکت مسوولینو په افغانستان کې د زر مېگاواټه په وړتیا د لمریزې برېښنا د تولید په برخه کې د پانگونې لپاره خپله لېوالتیا څرگنده کړې ده.
په خبرپاڼه کې ویل شوي، د اوبو او انرژۍ وزارت مرستیال د یاد شرکت د پانگونې د لېوالتیا هرکلی کړی او د هر ډول همکارۍ ډاډ یې ورکړی دی.: «دواړو لورو د دغې پانگونې لپاره د زمینې چمتو کېدو او عملي چارو د پیلېدو لپاره پر لازیاتو همغږیو او د چارو پر چټکتیا باندې ټینگار وکړ.»
د یو بل خبر له مخې، د اوبو او انرژۍ وزارت چارسمبالي وزیر د فراه د بخشاباد بند څخه لیدنه کړې ده او مسوولینو ته یې سپارښتنه کړې، چې د یاد بند چارې دې چټکې کړي.
د اوبو او انرژۍ وزارت وزیر ملا عبدالطیف منصور ویلي، د بخشاباد بند نه یوازې یوه بنسټیزه پروژه ده، بلکې د فراه د خلکو ستره اړتیا، د ا.ا.ا او د دغه وزارت د رهبري له لومړیتوبونو څخه ده، چې د نوموړي بند ژر تر ژره رغېدو لپاره د ا.ا.ا مشرتابه او همدارنگه د اوبو او انرژي وزارت رهبري گړندۍ هڅې روانې کړې دي.:«د لومړي پړاو د رغولو چارې دې په چټکۍ سره پرمخ یوسي، ترڅو دوهم پړاو ته لاره هواره شي. د بخشاباد بند لپاره کافي بودیجه او وړتیا شته او ترڅنگ یې یو شمېر نور انجنیران او ماشینرۍ هم را رسېدلي دي، هیله شته چې د دغه بند چارې لا گړندۍ شي.»