د مالیې وزارت وايي، د کابل ښار په میرویس میدان(کوټهسنگي) کې د یوې سترې او معیاري سوداگریزې ودانۍ«د ملت سوداگریز مارکېټ» د جوړولو چارې د مالیې وزارت او خصوصي قراردادي شرکت د مسوولینو له لوري پیل شوې.
له مالیې وزارت څخه په خپره شوې خبرپاڼه کې ویل شوي، په یاده سیمه کې د مالیې وزارت اړوند په دوه جریبه ځمکه باندې د میهن ملت رغنیز خصوصي شرکت له لوري د ۴.۵ مېلیونه ډالرو په پانگونې سره په معیاري بڼه ۱۲ پوړیزه ودانۍ او ۳۰۰ سوداگریزې هټۍ جوړېږي، چې ورسره به سلگونه کسانو ته په مستقیم او نامستقیم ډول د کار کولو زمینه برابره شي.
د خبرپاڼې له مخې، دغه سوداگریز مرکز به په درېیو کلونو کې جوړ شي، چې له درکه به یې هر کال ۳۸ مېلیونه افغانۍ عواید د دولت خزانې ته اضافه کېږي.
د مالیې وزارت د معلوماتو پر بنسټ، اوسمهال د کابل سربېره په گڼو ولایتونو کې سوداگرو او پانگهوالو ته ځمکې ورکړل شوي، چې سوداگریز مارکېټونه پرې جوړ کړي.