یو شمېر نړۍوالو رسنیو خبر ورکړی دی، چې د اسلامي همکاریو سازمان د سرمشریزې په ۱۵ غونډه کې د دغه سازمان غړو پر اسرائیلو باندې د پراخو بندیزونو غوښتنه کړې ده.
د اسلامي همکاریو سازمان سرمشریزې په دې غونډه کې د دې سازمان ۵۷ غړو هېوادونو د اسرائیلو لخوا پر فلسطینیانو د یرغل له امله د پراخو بندیزونو غوښتنه کړې ده.
په دې غونډه کې د اسلامي همکاریو سازمان په بیانیه کې پر اسرائیلو د ډيپلوماټیکو، سیاسي، او حقوقي فشارونو واردولو سربېره پر نړۍواله کچه د اقتصادي، ورزشي او فرهنګي بندیزونو لګولو په غوښتنه ټینګار شوی دی.
په بیانیه کې همداراز د اسراییلو د مجازات او له دې هېواد سره د اړیکو د پای ته رسولو ترڅنګ له قید او شرط پرته په غزه کې د اوربند او د اړینو بشري مرستو د رسولو غوښتنه هم شوې ده.
د یادولو وړ ده چې د اسلامي همکاریو د سازمان ۱۵ سرمشریزه د ګامبیا په پلازمېنه “بانجول” کې جوړه شوې وه.