یو شمېر رسنيو خبر وکړی، چې د قطر سرې میاشتې د نړۍوالې پراختیا او مرستو څانګې مسوول ډاکټر “محمد صاح ابراهیم” د افغاني سرې میاشتې ټولنې مشر “مطیع الحق خالص” سره د ۱۶۹ سوري زړه لرونکو ناروغانو د درملنې هوکړه لاسلیک کړې.
د دې هوکړې د لاسلیک پر مهال د افغاني سرې میاشتې ټولنې مشر د قطر سرې میاشتې او نورو مرستندویه بنسټونو څخه مننه کړې، چې د سوري زړه ناروغانو د درملنې په برخه کې یې افغانۍ سرې میاشتې ټولنې ته د مرستې لاس ورکړی دی.
د یادونې ده چې په تېرو دوو کلونو کې افغاني سرې میاشتې ټولنې ۳زره ۹۴ د سوري زړه ناروغ ماشومان د درملنې په موخه کورنیو روغتونونو ته ورپېژندلي او په زرګونو نور لا هم خپل نوبت او درملنې ته انتظار کوي.
په افغانستان کې د سوري زړه لرونکو ماشومانو شمېر زیات دی او د سرې میاشتې اداره له ډیر پخوا را پدیخوا د ګڼ شمېر مرستندویه ادارو او هېوادونو په مرسته د داسې ناروغانو درملنه کوي.