د کار او ټولنیزو چارو وزارت وايي، د دغه وزارت چارسمبالی وزیر عبدالمنان عمري د افغانستان اسلامي امارت په استازیتوب د روسیې د سنټ پټرزبرگ په ۲۷مه اقتصادي سرمشریزه کې د گډون په موخه روسیې ته رسېدلی دی.
له یاد وزارت څخه په خپره شوې خبرپاڼه کې ویل شوي، یاده غونډه د روانې جون میاشتې له ۵مې نه تر ۸ مې پورې جوړېږي.
د خبرپاڼې له مخې، د کار او ټولنیزو چارو چارسمبالی وزیر به په یاده اقتصادي سرمشریزه کې د سیمې او نړۍ هېوادونو سره د بالفعله او بالقوه اقتصادي او سوداگریزو فرصتونو په اړه د وینا سربېره د گڼ شمېر هېوادونو او سیمهییز او نړیوالو سازمانونو له استازو سره هم لیدنې ولري او د علاقې وړ موضوعاتو په اړه به بحثونه وکړي.
په خبرپاڼه کې ویل شوي، د سنټ پرزبرگ اقتصادي سرمشریزه د تېرو ۲۷ کلونو راهیسې د روسیې په اقتصادي پلازمېنه سنټ پټرزبرگ کې د سلگونه زره مېلمنو په حضور کې جوړېږي او د نړۍ د بېلابېلو اقتصادي ارزښتمنو مسئایلو په خبرې کېږي. همدارنگه په یاده سرمشریزه کې د اقتصاد او سوداگرۍ په برخو کې تړونونه هم لاسلیک کېږي.
د کار او ټولنیزو چارو چارسمبالی وزیر تېره اوونۍ قطر ته هم تللی و، چې هلته یې له گڼو قطري چارواکو سره د افغان کاریگرو د ستونزو په اړه خبرې کړې وې.