انادولو خبري اژانس اسرائیلي رسنیو له قوله راپور ورکړی، چې امریکا د ایران پر ضد د احتمالي پوځي برید لپاره د چمتووالي په ترڅ کې د اسرائیلو سوېل ته ۱۰ پوځي باروړونکې الوتکې لېږدولې دي.
د راپور له مخې، د اسرائیلو دولتي ټلوېزیون «کان» ویلي، چې دغه الوتکې د عوفدا او نواتیم پوځي اډو ته رسېدلې او ورسره هممهاله اردن، سعودي عربستان او قطر ته هم د امریکا پوځي الوتکې لېږل شوې دي.
د راپور له مخې، الوتکې له ټکساس ایالت څخه الوتلي، خو امریکا تر اوسه د دغو لېږدونو پخلی نه دی کړی او د الوتکو د بار او د برید په اړه د واشنګټن وروستۍ پرېکړه هم روښانه نه ده.
د راپور له مخې، یوه اسرائیلي چارواکي ویلي، چې امریکا او اسرائیل د احتمالي پوځي اقدام لپاره نږدې همغږي لري او د ټرمپ د هرې پرېکړې لپاره چمتووالی نیسي.
دا په داسې حال کې ده، چې د والسټریټ ژورنال په وینا، د امریکا د مرکزي قوماندانۍ مشر هم ټرمپ ته د ایران پر ضد د احتمالي بریدونو پوځي طرحې وړاندې کړې دي.