دغه څرګندونې د افغانستان د اسلامي امارت د لوړو زده کړو وزیر شیخ ندا محمد ندیم د فدارتیف روسیې د پوهنې او لوړو زده کړو وزیرانو په دویمه نړۍواله ناسته کې کړې دي.
د لوړو زده کړو وزارت ویاند ضیاءالله هاشمي پر خپله “اکس” پاڼه لیکلي، د لوړو وزیر په دغه ناسته کې ګډونوالو ته د افغانستان د تحصیلي نظام په اړه معلومات وړاندې کړل.
هغه وویل، چې د ا.ا.ا د علم پرمختګ او په دې ډګر کې له سیمې او نړۍ سره سیال کېدو ته ژمن دی.
هغه په خپلو خبرو کې زیاته کړه: “د ا.ا.ا له حاکمیت وروسته زموږ هېواد د سیاسي، اقتصادي او نورو برخو تر څنګ په تحصیلي ډګر کې هم ډېر پرمختګونه کړي، چې د بېلګې په توګه د ۱۳۱ څانګو د نصاب بیا کتنه او ۱۴ سترو زېربنایي پروژو بشپړول یادولی شو؛ همدارنګه اوسمهال شاوخواه ۵ سوه زره محصلین د افغانستان په پوهنتونونو کې په زده کړو بوخت دي”.
د لوړو زده کړو وزیر د خپلو خبرو په دوام وویل، چې افغانستان همېشه د نورو له یرغل سره مخ شوی او زیان یې لیدلی دی، خو د ا.ا.ا هیڅ وخت د نورو په کورنیو مسایلو کې مداخله نه ده کړې او له نورو هم توقع ده چې ورته عمل وکړي.
په دغه ناسته کې د لوړو زده کړو وزیر له ټولو غړو هېوادونو وغوښتل، چې له افغانستان سره په علمي ډګر کې د ګډو همکاریو هوکړې او تړونونه لاسلیک او عملي کړي، څو د طرفینو له تجربو او مهارتونو څخه ګټه پورته شي.
دغه ناسته چې هر کال د فدراتیف روسیې په تاتارستان کې جوړيږي، پکې ۴۲ هېوادونه غړیتوب لري؛ د ناستې موخه د غړو هېوادونو تر منځ د ګډو علمي همکاریو ایجاد، په راتلونکي کې د ګډو اکاډمیکو پروګرامونو جوړول، د یو او بل له تجربو څخه ګټه اخیستل او په علمي ډګر کې د شته ستونزو پر وړاندې مبارزه ده.