د امارتي شرکتونو عمومي رياست ويلي، چې د دې رياست اړوند افغان ګاز امارتي شرکت په هرات کې د ټاپي پروژې د ۲۸.۷ کیلومتره فرعي ګاز نللیکې مسیر او حریم، او د ګاز د وېش د شپږو شبکو موقعیتونه د تخنیکي غونډو او ساحوي ارزونو له لارې تثبیت کړي دي.
د امارتي شرکتونو ویاند محمدنبي بهار وایي، دغه نللیکه به د زندهجان ولسوالۍ له سیمې د هرات اوسني او نوي صنعتي پارکونو، استوګنیزو سیمو او د سياېنجي ګاز تولید تاسیساتو ته طبیعي ګاز ولېږدوي.
د نوموړي په وینا، د دغې نللیکې له لارې به د عزیزي انرژۍ شرکت له لوري پلان شوي ۳۰۰۰ مېګاواټه برېښناکوټ ته هم د ګاز رسولو زمینه برابره شي.
بهار زیاتوي، تخنیکي ارزونې د دې لپاره ترسره شوې چې د نللیکې مسیر له موجوده تاسیساتو او راتلونکو پراختیايي پروژو سره تداخل ونه لري او چارې د ټاکل شویو معیارونو له مخې پر مخ ولاړې شي.