د ترانسپورت او هوايي چلند وزارت وايي، د ایران ایر نړیوال هوايي شرکت کابل نړیوال هوايي ډگر ته الوتنې پیل کړې، چې یاد شرکت به د اوونۍ یوه الوتنه ولري.
د یاد وزارت د مسوولینو په خبره، ایران ته د اریانا افغان او کامایر هوايي شرکتونو ترڅنگ ماهان، کېش او یزد شرکتونه هم الوتنې لري، چې سوداگرو او نورو مسافرو ته د پاموړ اسانتیاوې برابرې شوې دي.
له دې وړاندې ترکېش ایر لاین او د یو شمېر نورو هېوادونو هوايي شرکتونو هم کابل ته الوتنې پیل کړې وې.
نږدې یوه اوونۍ وړاندې له خوست څخه متحده عربي اماراتو ته هم مستقیمې الوتنې پیل شوې، چې ورسره به د زرگونه مسافرو ستونزې هوارې شي.