لیکوال: ارغوان وطنیار
دا چې د قطر په پلازمینې دوحه کې د افغانستان په تړاو د جون د میاشتې پر دېرشمه نېټه درېیمه دوه ورځنۍ ناستې لپاره تابیا نیول شوې ټولو اړخونو ورته مثبت غبرګونونه ښودلي.
تازه د اسلامي امارت د بهرنیو چارو وزارت سنبال چاري ښاغلي امیرخان متقي ویلي: (موږ د دې ناستې هرکلی کوو او په دې ناسته کې موږ ته رسمي بلنه راکړل شوې، له دې معلومېږي چې نړۍ د طالبانو حقانیت درک کړی، موږ هم له ټولې نړۍ سره ښې اړیکې غواړو، ان موږ د امریکا او اروپا سره نږدې او دوستانه اړیکې غواړو).
همدا ډول د هزاره قومونو سیاسي مشر محمد محقق ویلي چې: د کورنیو چارو وزیر خلیفه صاحب سراج الدین حقاني د سولې سړی دی، افغانستان کې د سولې او ثبات لپاره ښه نیت او راسخه اراده لري.
په افغانستان کې د ملګرو ملتونو ځانګړې استازې مېرمن روزا اوتنبایو هم د دوحې درېيمې ناستې لپاره د بهرنیو چارو وزیر امیر خان متقي سره په اجنډا کار کوي او نوموړې وايي چې په داسې اجنډا کار کوو چې افغانستان کې ټول اړخونه ورسره مخالفت ونه ښیي او ټولو ته د منلو وړ وي.
دا چې د سیمې هېوادونو د دوحې له ناستې ملاتړ کړی او په کور دننه د اسلامي امارت د مسئولینو او د اسلامي امارت سیاسي مخالفینو ټولو د دوحې له درېیمې ناستې هرکلی کړی او ملاتړ یې ترې اعلان کړی؛ ټولو د دوحې ناسته د افغانستان د سولې او ثبات لپاره اړینه او مهمه بللې.
د ټولو اړخونو لخوا د دې ناستې لپاره شین څراغ ښودل یو مثبت تغیر دی او په دې برخه کې ډېر کرېډېټ د اسلامي امارت باتدبیره مشرانو ته ورکول کېږي.
تاسو د امیرالمومنین په اختریز پیغام کې واورېدل چې نوموړي وویل: (د سولې، ثبات او د اسلامي نظام د ټېکاو لپاره له خپل موقف تېر دی)، دا تېرېدنه او قربانۍ د دې لامل شوې چې په کور دننه او بیرون ملي او بین المللي اجماع په شکل ګیرۍ کې ده.
د روسیې لخوا اسلامي امارت سره د تعامل غږ پورته کول، د ترکمنستان لخوا د اسلامي امارت د بندیزونو له لیسته ایستل، د عربي هېوادونو له لوري د افغانستان حکامو ته سیاسي پروټوکول ورکول، د ایران او چین لخوا تر بل هر وخت اقتصادي او سیاسي تعاملاتو چټکوالی بې څه نه دی.
نو ویلی شو چې د دوحې د ناستې لپاره نېک نیت حتماً نېکه ثمره لري.
افغانستان دې نېکمرغه وي.
یو عظیم ملت دې سربلنده وي.
په دې جغرافیې دې د سولې لمر وځلېږي.