د احصایې او معلوماتو ملي اداره وايي، د تېرې غويي میاشت په موده کې د نړۍ گڼو هېوادونو ته د ۱۱۴ مېلیونه ډالرو په ارزښت صادرات شوي دي.
له یادې ادارې څخه په خپره شوې خبرباڼه کې ویل شوي، د ۱۴۰۳ کال په وري مياشت کې د هېواد د صادراتو ټول ارزښت ۹۵،۶ مېلیونه ډالره و.
د ارقامو تحلیل ښيي چې د ۱۴۰۳ کال په غويي میاشت کې د صادراتو ارزښت د ۱۴۰۳ کال د وري مياشتې په پرتله ۱۹ مېليونه ډالره زیاتوالی لري.
په خبرپاڼې له مخې، د هېواد په کچه د ۱۴۰۳ کال د غويي مياشتې د صادراتو او وارداتو اړوند ارقام راټول او تحليل کړي دي.
د دې ارقامو له مخې په ياده مياشت کې د هېواد په کچه د صادراتو ټول ارزښت ۱۱۴،۶ ميليونه ډالر او د وارداتو ټول ارزښت ۹۵۰،۵ مېليونه ډالرو ته رسېږي.
دا په داسې حال کې ده، چې له بل لوري د ۱۴۰۳ کال په وري میاشت کې د هېواد د وارداتو ارزښت ۶۵۰ میلیونه ډالرو ته رسېده، چې د روان کال په غويي مياشت کې د ۳۰۰،۵ مېلیونه ډالرو په ارزښت زیاتوالی پکې راغلی دی.
ارقام ښيي چې د ۱۴۰۳ کال په غويي میاشت کې تر ټولو زيات صادرات پاکستان، هند او متحده عربي اماراتو ته او تر ټولو زیات واردات بیا له ایران، چین او پاکستان څخه شوي دي.
د یادونې وړ ده، چې صادراتو کې صادرات او بيا ځلي صادرات شامل دي او په وارداتو کې ټول محصولي او غير محصولي واردات حساب شوي دي.