د اوبو او انرژۍ وزارت وايي، د پکتیکا په خیرکوټ ولسوالۍ کې یو چیکډیم جوړ او گټهاخیستنې ته وسپارل شول.
له یاد وزارت څخه په خپره شوې خبرپاڼه کې ویل شوي، په دغه چیکډیم څهباندې ۳مېلیونه افغانۍ لگښت راغلی او د څلورو میاشتو په موده کې یې کارونه بشپړ شول.: «د دغه چیکډیم په جوړېدو سره ۸۳۸۰ متره مکعب اوبه ذخیره او د اوبو په برخه کې به د سیمې د اوسېدونکو ستونزې هوارې او د کارېزونو او چینو اوبه به تغذیه او پياوړې شي.»
د خبرپاڼې له مخې، د دغه چیکډیم تړون له یو کورني شرکت سره شوی و او د څلورو میاشتو په موده کې یې کارونه بشپړ او د گټهاخیستنې وړ وگرځېد.
د اوبو او انرژۍ وزارت د معلوماتو پر بنسټ، د هېواد د ټولو ولایتونو په ولسوالیو کې د اوس لپاره یو د یو چیکډیم د جوړولو اراده لري، چې د لسگونه چیکډیمونو کارونه بشپړ شوي او په گڼو چیکډیمونو کار روان دی، چې په نږدې راتلونکې کې به یې کارونه بشپړ شي.
چیکډیمونه د کال په ټولو موسمونو کې بزگرانو ته اوبه برابروي، د ورښتونو اوبه ذخیره کوي او د ځمکې لاندې اوبو په پیاوړي کولو کې گټور ثابت شوي دي.