لیڪوال: اېمل پښتون
په افغانستان کې د ملګرو ملتونو سیاسي استازولۍ، یا یوناما د افغانستان د بشري حقونو اړوند په یو خپور کړي راپور کې ویلي: چې د طالبانو د حکومت د امر بالمعروف او نهی عن المنکر وزارت له لوري، ترسره شویو اقداماتو د خلکو تر منځ د وېرې او ګواښ فضا پراخه کړې ده.
یونما په خپل هر دوه میاشتني راپور کې شرعي احکام لکه حدود، قصاص، حجاب او داسې نور (انسان ضد) کړنې بولي.
خو يوناما ته د اسلامي امارت ځواب په دې ډول وو: کوم احکام چې د امربالمعروف، نهی عن المنکر او سمع شکایاتو وزارت لخوا توصیه کېږي هغه معلوم اسلامي احکام دي.
په افغانستان کې د اسلامي امارت په حاکمیت سره د اتباعو ټول شرعي حقوق تامین دي، که ښځينه دې که نارینه شرعي برخورد ورسره کېږي او د اسلامي شریعت احکام د قوانینو په څېر د اجرا وړ دي، په دې اړه له چا سره هېڅ ډول زور زیاتی او ظلم نه کېږي.
یوناما ویلي: «چې دغه وزارت د ملکفیتونو او بندیزونو په اړه د اسلامي قوانینو څخه د طالبانو د حکومت د چارواکو د تفسیر پر بنسټ اوامر صادر کړي دي» یعنې دوی داسې وایي: چې ګویا طالبان ولې زموږ تفسیر نه پلی کوي.
له غرب څخه مسلمانانو ته راتلونکې نسخې، چې اسلام یې پر اسلامونو باندې تقسیم کړی دی، لکه: امریکایې اسلام، اروپایې اسلام، فرانسوي اسلام، کاناډایي اسلام او بالاخره غربي اسلام، یعنې دوی په دې اندښنه ښکاره کړې ده، چې طالبان ولې امریکایې اسلام نه پلی کوي، ولې فرانسوي اسلام نه پلی کوي، ولې غربي اسلام نه پلی کوي، طالبان ولې له اسلام څخه خپل تعبیر او تفسیر اخلي.
غرب غواړي چې هر څوک او د هر دین پیروان باید زموږ په رقم واوسي، یعنې د خپل دین او مذهب په تقابل کې واقع شي، چې د یونما دغه فکر خپله یو ناورین زیږوونکی فکر دی.
پر نړۍوال سټېج سپاره خونخواران له هر هېواد او نظام څخه دا هیله او تمه لري، چې د دوی وضع کړي قوانین مراعات کړي او نړۍ د دوی په خوښه راوڅرخي.
یوناما د لویدیځو قدرتونو یوه سیاسي وسیله او د جاسوسۍ ځاله ده او په افغانستان کې یې ماموریت له بدو او ناوړو سیاستونو پرته بل څه نه دي.
م.م. داسې برنامه نه لري، چې په انسانیت یوڅه ور اضافه کړي، بلکې دوی پر انسانیت وراضافه دي او ټول بشریت ته تر خپل عنوان لاندې لارورکي قوانین ټاکي، دوی نړۍ یوازې د خپل ځان ملکیت بولي.
آیا یوناما کله هم د امریکا په اړه داسې یو راپور خپور کړی، چې امریکا داعش اېجاد کړ؟ چې د بشر لپاره تر داعش خطرناکه وباء او طاعون بل نشته.
آیا یوناما په اسلامي هېوادنو لکه: افغانستان، عراق، سوریه او اوس فلسطین کې د امریکا له جنایاتو کوم راپور خپور کړ؟ آیا یوناما د اسرايیلو له جنایتونو کوم راپور وړاندې کړ؟ یوناما ولې د فلسطین په ټول وژنه چوپ ده؟
د دې ټولو سوالونو ځواب یو کېدلی شي، چې یونما د م.م او په ځانګړې توګه د امریکا استخباراتي او شیطاني څانګه ده، چې د بشري مرستو او بشري وضیعت د څارنې تر شعار لاندې امریکایي او غربي ګټې تعقیبوي او بس.