له ارګ څخه په خپره شوې خبرپاڼه کې راغلي، چې د ریاستالوزراء مقام د دفتر عمومي رئیس، ډاکټر ملا عبدالواسع خادم د ویډیو کنفرانس له لارې د افغانستان لپاره د برتانیې له ځانګړي استازي ریچارډ لینډزي سره د افغانستان او پاکستان ترمنځ د ستونزو د حل او د اړیکو د ښه کولو په اړه خبرې کړې دي.
د برتانیې ځانګړي استازي ویلي، هېواد یې د دواړو لورو ترمنځ د ستونزو د حل لپاره هڅې کوي او په نږدې راتلونکي کې به پاکستان ته سفر وکړي، ترڅو له چارواکو سره د یادو ستونزو په اړه خبرې وکړي.
ملا عبدالواسع د برتانیې د هڅو د قدردانۍ ترڅنګ ویلي، افغان حکومت د ملي ګټو او متقابل درناوي پر بنسټ له ګاونډیو او نورو هېوادونو سره د ښو اړیکو او ګډو همکاریو غوښتونکی دی او د سیمهییز ثبات او سولې ملاتړ کوي.
د خبرپاڼې د معلوماتو له مخې، په یاد ویډیو کنفرانس کې د برتانیې د بهرنیو چارو وزارت سیاسي افسر جېمز بیلمونټي او سیاسي سلاکار فیض محمد وفامل هم ګډون درلود.