د ټولگټو وزارت وايي، د سالنگونو بدیله لاره یې پرانیستې ده، چې کوچني مسافر وړونکي وسایط به په دغه لاره تگ راتگ کوي.
له یاد وزارت څخه په خپره شوې خبرباڼه کې ویل شوي، د ټولگټو چارسمبالي وزیر محمد عیسٰی ثاني شمال ته د خپل سفر پر مهال د سالنگونو دویمه بدیله لاره پرانیستې ده.
د خبرپاڼې له مخې، د سالنگونو لویې لارې له کاري بهیر څخه هم لیدنه شوې.: «ټولگټو وزارت د هېوادوالو د هوسا تگ راتگ لپاره په شمالي او سوېلي سالنگونو کې بديل مسير چمتو کړی چې د اصلي مسير د کار په جريان کې به کوچني مسافر وړونکي وسايط له ياد مسير څخه تگ راتگ کوي.»
په خبرپاڼه کې ویل شوي، د ټولگټو چارسمبالي وزیر د سالنگونو لویې لارې له درېیو برخو(شمالي سالنگ، سوېلي سالنگ او دوشي ـ خنجان) له کاري بهیر او کرش پلانټونو څخه لیدنه کړې او پلې کوونکو ډلو ته یې لارښوونه کړې، چې د یادې لویې لارې کار دې په غوره کیفیت، چټکتیا او د وزارت د پلان سره سم بشپړ کړي.
د یادونې وړ ده، د روانې زمري میاشتې له ۴مې نېټې څخه په دغه لاره تلونکي کوچني وسايط د ورځې لخوا له دواړو خواوو له چمتو شوي بديل مسير څخه، باروړونکي او غټ مسافر وړونکي (۵۸۰-۴۰۴-۳۰۳) وسايط په نوبتي ډول يوه شپه له شمال څخه سوېل لوري ته او بله شپه له سوېل څخه شمال لوري ته د تگ اجازه ورکول کېږي ؛ خو کوچنیو مسافروړونکو وسایطو ته د شپې په دغه وخت د تگ را تگ اجازه نه ورکول کېږي.
سالنگ د هېواد له مهمو لویو لارو څخه ده، چې مرکزي ولایتونه له شمالي ولایتونو سره نښلوي. همدارنگه دغه لاره د هېواد له مهمو سوداگریزو لارو څخه ده، چې د حیرتان بندر، شېرخان بندر، اقینې بندر او نورو بندرونو څخه سوداگریز توکي د هېواد گڼو ولایتونو ته وړل کېږي.