د ملگرو ملتونو د همغږۍ اداره(اوچا) وايي، په افغانستان کې ماشومان د ناچاودېدونکو توکو اصلي قربانیان دي، چې په سلو کې ۸۸ سلنه قربانیان یې ماشومان دي.
یادې ادارې په خپل راپور کې ویلي، د روان زېږدیز کال په لومړیو شپږو میاشتو کې په افغانستان کې د ناچاودو توکو په چاودنو کې ۲۹۲ تنه قرباني شوي دي، چې ۵۰ سلنه پېښې له ناچاوده توکو سره د ماشومانو د لوبو پر مهال رامنځته شوي دي.:«د ۲۰۲۴ کال له جنورۍ تر جون میاشت پورې په ټوله کې ۲۹۲ ملکي تلفات ثبت شوي چې د چاودېدونکو توکو د چاودنو ۸۸ سلنه قربانیان ماشومانو دي چې کابو ۵۰ سلنه پېښې د ماشومانو د لوبو پر مهال او ۱۵ سلنه یې د اوسپنیزو توکو د راټولولو پر مهال رامنځته شوې دي.»
د یادې ادارې د راپور پر بنسټ، که په افغانستان کې د ماین پاکۍ چارې تمویل نهشي؛ نو په افغانستان کې به د ۳.۴ مېلیونه وگړو ژوند له گواښ سره مخ شي.:«په ټول هېواد کې هره میاشت چاودېدونکي توکي ۱۱۰ تنه وژني. پرو سږکال د دغو قربانیو ۸۹ سلنه ماشومان وو. له ۱۹۸۹ ز کال راهیسې په افغانستان کې ۴۵ زره کسان د ځمکنیو ماینونو او ناچاودو توکو د پاتې شونو قرباني شوي دي.»
د ملگرو ملتونو د همغږۍ ادارې(اوچا) ویلي، د روان کال تر پایه د خپلو فعالیتونو د دوام لپاره د بودیجې له کمښت سره مخ دي او افغانستان یې د نړۍ د هغو هېوادونو په سر کې یاد کړی، چې تر ټولو ډېر ځمکني ماینونه لري. :«افغانستان یو له هغو هېوادونو دی، چې تر ټولو ډېر پر ځمکنیو ماینونو او د جگړې له پاتې شونو ککړ دی او دا د بیارغونې او ثبات د ټینگښت لپاره د پام وړ خنډونه جوړوي.»
په دې راپور کې ویل شوي، د ټول افغانستان یو اعشاریه دوه مېلیون متر مربع ځمکه له ځمکنیو ماینونو او ناچاودو توکو ککړه شوې ده او د افغانستان په ککړو ځمکو کې ۲۶۲ ولسوالۍ دي.
همدا راز په دې راپور کې ویلي، د ماشومانو له لوري د فلزي او سپنیزو توکو راټولول او له ناچاودو توکو سره د ماشومانو نه بلدتیا هغه لاملونه دي، چې گڼ قربانیان یې هم ماشومان دي.
د ماین پاکۍ د همغږۍ او انسجام ریاست وایي د هېواد په ۲۹ ولایتونو کې د ماین پاکۍ ۲۸۲ ډلې فعالیت لري او تر دې دمه یې زرگونه ماینونه شنډ کړي دي.
په افغانستان کې ډېری ماینونه د پخواني شوروي اتحاد د یرغل نه پاتې دي او د امریکايي یرغل پر مهال هم گڼ ماینونه ښخ شوي، چې نږدۍ میاشت د لسگونه کسانو ژوند اخلي.