د ټولگټو وزارت وايي، د اوسپنې پټلۍ مرستیال بختالرحمن شرافت د ترکمنستان د اوسپنې پټلۍ ادارې د رئیس ازاد اتامرادوف او مل پلاوي سره په کابل کې لیدلي دي.
له یاد وزارت څخه په خپره شوې خبرپاڼه کې ویل شوي، دغه لیدنې دوې ورځې روانې وي، چې پکې د دواړو هېوادونو گډو پلاوو د دوه اړخيزو اوسپنیزو همکاريو د لا پراختيا په موخه مفصل بحثونه وکړل.: «د ناستې په لومړۍ ورځ د دواړو لورو ترمنځ؛ د تورغونډۍ سټېشن پراخوالي، د تورغونډۍ -هرات اوسپنیزې کرښې د امتداد، چې لومړۍ برخه یې تر صنوبره پورې ۲۲ کیلومتره اوږد والی لري؛ خبرې اتري وشوې.»
د خبرپاڼې له مخې، دغه راز د ترکمنستان پلاوي په دغه ناسته کې په افغانستان کې د اوسپنیزې کرښې په برخه کې، پانگونې ته لیوالتیا وښوده. :«دوی د تورغونډۍ سټېشن د پراختيا او د تورغونډۍ-هرات لومړۍ برخې ۲۲ کیلومتره اوسپنیزې کرښې د ساختمان او رغونې په برخه کې پانگونې ته چمتو دي او خپل لگښت به د کرښې له فعالېدو وروسته له لاسته راغلو عوايدو څخه بېرته تر لاسه کړي.»
په خبرپاڼه کې ویل شوي، د دغو بنسټونو په رغونې سره به د دواړو هېوادونو ترمنځ د سوداگريزو او ټرانزیټي توکو په لېږد-رالېږد کې زیاتوالی راشي او خصوصي سکتور ته به د انتقالاتو په برخه کې لا زیاتې اسانتیاوې رامنځ ته شي، چې د قرارداد او هوکړې وروسته به يې رغنیزې چارې د روان زېږدیز کال د سپتمبر مياشتې په لومړۍ نېټه پيل شي. :«د کار د پيلولو په موخه ټولگټو وزارت د يادې کرښې ډېزاين ترکمنستان لوري ته سپاري، ترڅو هغوی د ډېزاين له مخې د يادې کرښې رغنیزې چارې پیل کړي.»
په دې لیدنو کتنو کې د دواړو خواوو ترمنځ د یادو موضوعاتو ترڅنگ د دوه اړخيزو ریلي همکاریو، د اوسپنې پټلۍ د کارکونکو لپاره د ښوونیزو پروگرامونو چمتو کول، د چارو د پرمخ وړلو لپاره د گډو کاري گروپونو رامنځ ته کول او د افغانستان، ترکمنستان، اذربایجان، جورجيا او ترکيې د پينځگونو کوريدور په اړه هم هر اړخیز بحث شوی دی.