وال سټریټ ژورنال، راپور ورکړی، چې د روسیې ولسمشر راتلونکې میاشت، خپلو امریکایي او چینایي سیالانو ته، د اوکراین جګړې د پای لپاره د یوې درې اړخیزې غونډې وړاندیز کړی دی.
سرچينې ويلي، په دغه طرحه کې د اوکراین ولسمشر او اروپايي هېوادونو ته د ګډون بلنه نه ده ورکړل شوې.
پوتین دغه وړاندیز د اکټوبر په نهمه نېټه له ټرمپ سره په یوه ټلیفوني اړیکه کې شریک کړی و.
په ورته مهال کرملین هم تایید کړې، چې د احتمالي ناستې په اړه خبرې اترې روانې دي، خو لا تر اوسه د غونډې د ترسره کېدو او د هغې د کاري اجنډا په اړه هېڅ روښانه هوکړه نه ده شوې.
دغه راز معلومات ښيي، چې ټرمپ تر اوسه په رسمي ډول له دې ناستې سره هوکړه نه ده کړې، خو ښايي هرکلی یې وکړي.
مسکو وړاندیز کړی چې دا درې اړخیزه غونډه دې په شینژن ښار کې د اسیا او ارام سمندر د اقتصادي همکاریو د غونډې په څنډه کې جوړه شي او پیکنګ هم ویلي که ټرمپ ورسره هوکړه وکړي، نو دوی به ورسره مخالفت ونه کړي.
وال سټريټ ژورنال، تحليل کړی چې مسکو دې درې اړخیزې غونډې ته د سترو قدرتونو په منځ کې د روسیې د ځایګي د ټینګښت او له خبرو اترو څخه د اروپا د څنډې ته کولو د یوې ښې موقع په سترګه ګوري.
د روسیې یوه پخواني استخباراتي افسر ویلي چې پوتین دا چوکاټ د «دویمې یالتا» او د نفوذ پر برخو د نړۍ د وېشلو په څېر بولي، خو والسټریټ ژورنال زیاته کړې چې دا بهیر کولی شي د اوکراین او د هغې د اروپايي متحدانو اندېښنې ډېرې زیاتې کړي.
پیکنګ هم اندېښنه لري، چې دا ناسته به یې له اروپا سره پر اقتصادي اړیکو ناوړه اغېز وکړي.