د ټولگټو وزارت وايي، د حيرتان-مزارشريف د اوسپنيزې کرښې اړوند نايباباد سټېشن (څلورم-پورټ) د افغانستان او ازبېکستان د اوسپنې پټلۍ د مسوولینو په شتون کې بشپړ او گټه اخیستنې ته وسپارل شو.
له یاد وزارت څخه په خپره شوې خبرپاڼه کې ویل شوي، د پرانیستې په دې مراسمو کې د رياست الوزراء اقتصادي مرستيال ملا عبدالغني برادر اخوند، د ټولگټو چارسمبالی وزیر ملا محمد عيسی ثاني، د اوسپنيزې کرښې مرستيال ملا بخت الرحمن شرافت، د ازبېکستان د ولسمشر ځانگړي استازي او د اوسپنې پټلۍ ادارې مرستیال او بلخ والي پکې گډون کړی و.
په خبرپاڼه کې د رياست الوزراء اقتصادي مرستيال ملا برادر له قوله ویل شوي، اسلامي امارت د هېواد د اقتصادي پیاوړتیا او پراختیا په موخه د سيمهييزو هېوادونو سره د افغانستان د نښلېدو بېلابېلې بدیلې لارې مومي.: «نايباباد (څلورم-تمځای) د ځمکني ترانسپورتي شبکې او سيمهييز اتصال مهم او بنسټيز جز تشکيلوي، چې د اقتصادي پرمختگ ترڅنگ په ټولنيز پرمختگ کې هم د پام وړ رول لوبوي.»
نوموړي ویلي، د نايب اباد سټيشن په فعالېدو سره به ځايي سوداگرو ته لازمې اسانتياوې رامنځ ته شي، د ريلي انتقالاتو فاصله به رالنډه شي او د نفتي او غير نفتي توکو د تخليې ځايونه به مشخص شي، چې مخکې دواړه يوازې په حيرتان پورټ کې تخليه کېدل.
د ټولگټو چارسمبالي وزیر ملا محمد عیسی ثاني ویلي، د نایب اباد څلورم پوټ له څو کاله ځنډ وروسته بیا ځلې فعال او گټې اخیستنې ته وسپارل شو، چې ۵۰ کیلومتره اوږدوالی لري.
نوموړي زياته کړه، چې اسلامي امارت غواړي د نایباباد د اوسپنيزې کرښې له لارې افغانستان د گاونډیو هېوادونو سره د تجارتي توکو د لېږد-رالېږد په څلورلارې بدل کړي.: «په نږدې راتلونکې کې به د ازبېکستان گډ تخنيکي پلاوی د افغان-ټرانس پروژې او جوزجان-فاریاب-بادغیس-هرات-نیمروز-فراه-هلمند-کندهار د حلقوي اوسپنيزې کرښې د تخنيکي موافقې په موخه افغانستان ته راشي او ان شاء الله دا کرښه به تر پاکستان پورې جوړېږي.»
د اوسپنيزې کرښې مرستيال شرافت ویلي، اوس ددې وخت رارسېدلی دی، چې افغانستان د گاونډيو هېوادونو په همکاري د نايب آباد په څېر معياري تمځايونه او اوسپنيزې کرښې جوړې کړي، ترڅو په دې توگه سيمه او نړۍ په هېواد کې دوامداره پانگونې ته را جذب کړو.
د نایباباد سټېشن د پرانیستې په مراسمو کې د ازبېکستان د ولسمشر ځانگړي استازي عصمت الله یرگشوف وویل، نن يې ثابته کړه، چې هېواد يې د افغانستان د ريل پټلۍ معياري کولو ته ژمن دی او د افغانستان د ملي اقتصاد د لا پياوړتيا لپاره په گډه هلې ځلې کوي.
د حيرتان-مزارشريف د اوسپنيزې کرښې ترميم چارې د تېر ۱۴۰۲ هـ.ش. کال په کب میاشت کې د یو ازبېکستاني شرکت له لوري د ۶مېلیونه او ۳۰۰زره امریکايي ډالرو په لگښت پیل شوې وې، چې په گټې اخیستنې سره به يې ريلي انتقالات او سوداگريز توکي د مزار شريف تر ښار پورې ورسېږي.