د کرنې اوبو لګولو او مالدارۍ وزارت ویلي، چې د ننګرهار په شپږو ولسوالیو کې د سرو املوکو حاصلات د تېر کال په پرتله څه باندې ۱۲ سلنه زیات شوي او ۱۶۰۴ مټریک ټنو ته د رسېدو اټکل یې شوی دی.
د وزارت د معلوماتو له مخې، سږ کال د کامې، اچین، کوز کونړ، سرهرود، خوږیاڼو او نازیانو ولسوالیو پر ۸۷۸.۵ جریبه ځمکه د سرو املوکو بڼونه شته، په داسې حال کې چې تېر کال دغه بڼونه پر ۸۳۳ جریبه ځمکه وو او ۱۴۲۶.۲۶۵ مټریک ټنه حاصل ترې ترلاسه شوی و.
مسوولینو د حاصلاتو د زیاتوالي لامل بڼوالو ته پر وخت روزنه، د کرنیزو سپارښتنو وړاندې کول، د بڼونو سم مدیریت او د لوړ حاصل لرونکو نوعو معرفي کول بللي دي.