ليکوال: عبدالله زاهد
د شر او فساد ډلې تر منځ اختلافات ورځ تر بلې زیاتېدونکي دي، ځکه چې د دې ډلې اصلي هدف شخصي ګټې او د بهرنیو پروژو عملي کول دي؛ دا حالت د افغانانو تر منځ د اتحاد او ورورولۍ د له منځه وړلو او د نفاق د پراخولو لامل ګرځي، کوم چې د دوی اصل هدف هم همدغه دی؛ د دې ډلې مشران لکه احمد مسعود، عبدالرشيد دوستم، امرالله صالح، محقق، او نور… د بهرنیو جاسوسي سازمانونو د ملاتړ، پیسو او د ډلې د مشري تر لاسه کولو په خاطر پر يو او بل انتقاد کوي.
نصرت اقبال چې د شر او فساد ډلې یو مهم غړی دی؛ په یوه تویټر سپېس کې د احمد مسعود په اړه څرګندونې کړې؛ هغه احمد مسعود ته د “فریبکار” او “دروغجن” لقب ورکوي.
نصرت اقبال زیاتوي چې:«احمد مسعود خپلو پلويانو ته ویلي چې افغان قومونه وښکنځي، پوچ او رد ورته ووايي؛ تر منځ یې نفاق خپور کړي».
همدا راز نصرت اقبال څرګندوي چې:«د احمد مسعود او د هغه ماما د پیسو په سر یو له بل سره په جنجال کې دي.» دا حالت او څرګندونې د دې حقیقت څرګندونه کوي چې د شر او فساد ډلې مشران د خپلو شخصي ګټو لپاره د قومونو تر منځ تعصب او نفاق ته لمن وهي.
په دغسي کړنو سره دوی غواړي د افغان ولس تر منځ نفاق او تعصب خپور کړي؛ دوی د پښتون، تاجک، ازبک، او هزاره قومونو تر منځ شخړې ته لمن وهي، هر یو د بل مخالفت کې ولاړ دي؛ د پنجشیري، فاریابي، مزاري، او نورو سیمه ییزو نومونو باندې يې هم ځانونه تقسیم کړي دي او هم د ولس د وېشلو هڅې کوي.
بل طرف طالبانو د واک ته له رسېدو سره د تعصب د ختمولو لپاره جدي ګامونه پورته کړي دي؛ طالبان هڅه کوي چې ټول ولس د یوه مسلمان او افغان په توګه متحد کړي او د پښتون، تاجک، ازبک او سيمييز تعصب له منځه يوسي چې تر ډېره بریالي شوي هم دي.
بهرني جاسوسي سازمانونه د شر او فساد ډلې ته د غربي پروژو د عملي کولو او د طالبانو په ضد جګړې کولو لپاره پیسې ورکوي چې د دې پیسو په سر د دوی تر منځ اختلافات رامنځته کېږي.
د دې ډلې مشران په ځانګړې توګه احمد مسعود د خپلو شخصي ګټو د تر لاسه کولو لپاره خپل خلک د قومونو تر منځ نفاق او تعصب ته هڅوي؛ ورته وايي چې سوشل میډیا کې قومونه وښکنځئ، دوی هڅه کوي چې په دې توګه د غربي شوم اهدافو عملي کولو ته لاره پرانېزي؛ تر څو له بهرنیو جاسوسي سازمانونو څخه پرې پیسې واخلي.
د دې ډلې ترمنځ د اختلافاتو یوه مهمه وجه د جعلي واک پر سر د جنجالونو زیاتېدل دي؛ په داسې حال کې چې په ټول افغانستان کې یوه لوېشت ځمکه هم په ولکه کې نه لري؛ نه هم وطن ته راتللای شي، نه هم په افغانستان کې د طالبانو په وړاندې مزاحمت کولای شي؛ خو د مشرتوب او جعلي واک پر سر بهرنیو هېوادونو کې جنجالونه کوي.
د شر او فساد ډلې هدف یوازې پیسه، واک او په سیمه کې د غربي ګټو خوندیتوب دی؛ دوی ته هیڅ فرق نه لري چې څوک پیسې ورکوي او کومې پروژې په سیمه کې پرې عملي کوي؛ دوی ته فرق نه ورکوي چې دا د افغان، مسلمان ولس او سیمې لپاره څومره خطرناکه کیدلای شي، بس د دوی یوازینی هدف واک او پیسې دي چې ورته د هر ډول عمل کولو لپاره تيار دي.
افغان ولس اوس د دوی په دروغجنو شعارونو هیڅ باور نه لري؛ د بهرنیو جاسوسي کړیو د مالي مرستو په مرسته دوی د خپل موجودیت ساتلو لپاره د افغانانو تر منځ نفاق او د قومونو تر منځ تفریق پراخوي؛ خو الحمدلله چې تر ډېره په هر ډګر کې ناکامه شوي.
د شر او فساد ډلې دغه حالت ته په کتلو ویلای شو چې د دوی آنلاین مقاومت به هم ډېر ژر ختم او دا ولس به يې له جنجاله خلاص شي؛ یو څوک چې د واک ترلاسه کولو مخکې په خپلو منځونو کې داسې اختلافات ولري، هغوی هيڅکله نشي کولی د یوه هېواد راتلونکی وټاکي؛ له دې امله هیڅ امکان نشته چې ولس دې په دوی باور وکړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.