د مقاومت شوری چې د تېر پرځېدلي جمهوريت د بدنامو سياسيونو د يو تشکيل جريان دی، امريکا او غرب ته د لابي ګرۍ لپاره له مختلفو لارو چارو کار اخلي چې يوه يې له دوی سره د افغانستان څخه د تښتېدلو نورو بدنامو څهرو او احزابو يو ځای کيدنه ده، دوی غواړي په دې سره غرب او امريکا په ځانګړي ډول د ټرمپ ټيم ته چې په راتګ سره يې د دوی په زړونو کې يوه نړۍ هيلې او اميدونه غوړېدلي دي؛ ځانونه مهم وښيي او دا ورته په ډاګه کړي چې مونږ کولای شو چې افغانان سره راټول کړو نو امريکا دې زمونږ سره مرسته او لاسنيوی وکړي.
هندوکشغږ ته د رسېدلو معلوماتو په اساس؛ څو ورځې وړاندې د مقاومت شوری په خپل منځي مجلس کې په دې موضوع اوږد بحث وکړ چې حنيف اتمر او د هغه له ټيم (د سولې او عدالت ګوند) سره، د شوری سره په يو ځای کېدو توافق وکړي او که نه؟ په غونډه کې د محقق، عطاء محمد نور او يونس قانوني، سرور دانش او ځينو نور کسانو له لوري د دې خبرې سره شديد مخالفت وشو او په دې يې اصرار وکړ چې په هيڅ صورت کې دې د اتمر له ټيم سره چې د جمهوريت د سقوط او افغانستان د بدبختۍ له اصلي عاملينو څخه دی؛ بحث او خبرې نه کېږي او مذاکرات دې ورسره ودرول شي.
په غونډه کې اسماعيل خان په دې ډير اصرار کاوه چې اتمر د انګلستان جاسوس دی او زه په دې اړه پوره اسناد او شواهد لرم، هغه په هيڅ صورت کې د شوری په خير نه دی او يواځې د هغه چا لپاره کار کوي چې استخدام کړی يې دی يعني انګلستان.
په غونډه کې محقق په دې هم ډير ټينګار کاوه چې د اتمر د ټيم غړي ټول ډير بې ادبه دي او د شوری د غړو او پخوانيو جهاديانو سخت توهين کوي او په دې باور دي او وايي چې دا خلک پخوانۍ او له منځه تللې يا له کاره لويدلې مهرې دي.
د هندوکشغږ د تر لاسه کړو معلوماتو په اساس د مقاومت شوری د رهبرۍ د غړو په وينا اتمر د انګلستان جاسوس دی او غواړي په مختلفو بهانو او تکتيکونو زموږ له لارې د انګلستان او غرب څخه راوړل شوې پروژې تطبيق کړي.
د څېړونکو په وينا د افغانستان څخه پخواني او فراري بدنامې څهرې او احزاب له غرب، ايران او نورو مختلفو هيوادونو څخه د استخباراتي پروژو په اخيستلو کې يو له بل سره په سيالۍ بوخت دي چې ځينې وخت يو بل ته د شراکت او ګډ کار وړانديزونه هم کوي.
څېړونکي زیاتوي؛ د نومبر مياشتې په لومړيو کې هم د ملي ډيالوګ تر نوم لاندې د حکمت کرزي او بابر فرهمند له لوري د انګلستان له لوري د اخستل شوې پروژې له لارې کنفرانس په لاره اچول شوی وو چې د مقاومت شوری له لوري د پيسو او امتيازاتو د تقسيم په سر ورسره اختلاف رامنځته شو او په غونډه کې له ګډون يې انکار وکړ.
د يادونې وړ ده چې هندوکشغږ د داسې يو سند په اړه معلومات ترلاسه کړي چې په دې نږدې ورځو کې د مقاومت جبهې له انګلستان څخه يوه پروژه اخيستې چې د يو ميليون ډالرو په اندازه پکې توافق شوی او د دې پيسو يوه برخه مقاومت جبهې ته په واک کې ورکړل شوې دي.