هندوکش غږ ته د رسېدلو اطلاعاتو پر بنسټ، د نورستان په کامدېش کې د پاور بانک جبهې(تش په نوم ازادۍ جبهې) له ماتې وروسته، په دغه جبهه کې اختلاف او درز رامنځ ته شوی او بیرته د آی ایس آی له لوري په امرانه ډول حل شوی دی.
د پاور بانک جبهې یو مسؤل فضل ربي خنجاني چې د نورستان په کامدېش کې یې تر سل تنو زیاتو غولول شویو کسانو مشري کوله، له ډېرو هیلو او پټو پلانونو سره راغلی و، خو ميدان ته په ښکته کېدو سره وضعیت پرې بدل شوی؟ د دوی په وړاندې لومړني وژونکي ضربات د دې لامل شول چې خنجاني له ټولو پلانونو سره بیرته د کرښې هغې غاړې ته لاړ شي.
د ترلاسه اطلاعاتو پر بنسټ، خنجاني د ماتې له لیدلو سره د شديدې وارخطایۍ سره مخ شوی؛ دا چې د پاور بانک جبهې یو شمېر غړي لا هم په ځینو خطرناکو سیمو کې محاصره پاتې دي، نو د خلاصون لپاره یې له قوماندان صفي څخه، چې د یاسین ضیاء د کورنۍ غړی او په چترال کې نظامي مسؤل دی، د بېړنۍ مرستې غوښتنه کړې ده، صفي ورته ویلي: «ما څو میاشتې په چترال کې د بدخشان طرف ته نښتې وکړې، خو داسې درانه تلفات مې نه دي ورکړي، تا څنګه په یوازې یوه ورځ کې دا ټول کسان له لاسه ورکړل؟ دا بې له دې چې تا خپل جنګیالي پلورلي او له طالبانو سره دې ورباندې معامله کړې ده، بله هیڅ معنی نه لري.»
هندوکشغږ ته سرچینو ویلي، چې د خنجاني او صفي ترمنځ له دې تورونو سره خپل منځي اختلاف او درز رامنځ ته شوی، چې تر دې زياتېدونکي اختلاف وروسته سمدستي د پوځي رژیم استخباراتو(آی ایس آی) مداخله کړې ده او د دوی ترمنځ یې موقتاً په امرانه ډول روغه – جوړه کړې ده. د آی ایس آی له دې مداخلې وروسته، قوماندان صفي هم اوس د جنګیالیو د خلاصون لپاره ورسره ملګری دی.
په نورستان کې د خبیث مثلث(پوځي رژیم، پاور بانک جبهې او داعش) د وروستیو تحرکاتو تر شا اصلي او شوم هدف دا و، چې پاکستان غوښتل د خپلو دغو ګوډاګیو او لاسپوڅو مهرو په واسطه د نورستان په حساس او ځانګړي موقعیت لرونکو ولسوالیو کې خپل خورا مهم او پټ استخباراتي او ستراتیژیک اهداف ترلاسه کړي، خو لله الحمد، د ځانګړو امنیتي ځواکونو د استخباراتي او کشفي اقداماتو له برکته د دښمن ټول لوی او پېچلي پلانونه مخکې له مخکې افشاء او په اوبو لاهو شول.