د پاکستان د طالبانو غورځنګ د يوې اعلاميې په خپرولو سره د سلطان محمود غزنوي په اړه د پاکستان د دفاع وزير له سپکاوي ډکو خبرو ته توند غبرګون ښودلی او خواجه اصف یې له معلوماتو لرې او ناپوه شخص بللی دی.
ياد غورځنګ په خپله اعلاميه کې ويلي دي« د یوه داسې دفاع وزیر لپاره، چې آن د خپل هېواد د دفاعي سیسټم په اړه معلومات نه لري، دا ډېر د بې شرمۍ ځای دی چې د امت د اتلانو سپکاوی کوي او لوټمار يې بولي د دفاع وزارت په منصب ناست خواجه آصف ته دومره هم نه ده معلومه چې د پاکستان د ځواکمن میزایل سیسټم نوم هم “غزنوي” دی، کوم چې د سلطان محمود غزنوي په نوم نومول شوی».
د پاکستان د طالبانو غورځنګ همدا راز په خپله اعلاميه کې د خواجه اصف خبرو ته توند غبرګون ښودلی او زياتوي چې «تحریک طالبان پاکستان د دې سپکاوي سخته غندنه کوي او همداراز له دیني علماوو او د منبر او محراب له خاوندانو څخه غوښتنه کوي چې د مسجد، مدرسې او منبر له لارې د ملت بچيانو او اولادونو ته ريښتينی اسلامي تاریخ ور زده کړي، هسې نه چې سبا ورځ زموږ په هېواد کې د غلو او فاسدو خلګو دا ډول ناوړه خبرې زموږ او ستاسې د نوي نسل اذهانو ته انتقال او زموږ وياړمن تاريخ زموږ په وړاندې تر خاورو لاندی شي».
د يادونې وړ ده چې تر دې وړاندې افغان حکومت هم د سلطان محمود غزنوي په اړه د پاکستان دفاع وزير له سپکاوي ډکو خبرو ته توند غبرګون ښودلی وو.