د الهي قوانینو تر څنګ، د انسانانو په لاس جوړو شويو قوانینو کې هم د شر او فساد خپرونکو سزا او قباحت معلوم دی، دوی د خپلو شخصي ګټو په نشه کې دومره ډوب روان وي، چې خپل او پردي نه پېژني او یواځې د بادار لخوا ورکړل شوی د بربادۍ هدف تعقیبوي.
په نوره نړۍ کې د شر او فساد لارویان نشته، دا مردوده پدیده د غربي نړۍ لخوا یواځې او یواځې په افغانستان کې پیدا او وپړسول شوه. دوی د خپلو ګټو لپاره هر لوري ته مایلان پیدا کوي، ژبې او رنګونه د خپلو ګټو لپاره په شېبو کې بدلوي.
تاریخ ګواه دی، چې دې خاورې د شر او فساد د لارویانو لخوا داسې بدې ورځې تجربه کړي دي، چې ویجاړۍ یې تر نن ورځې نه دي ابادي شوي. خو لا هم شریر عناصر له خپل بربریت څخه سر په لاس شوي نه دي. تازه د پرځېدلي جمهوریت د پارلمان وکیل او د شر او فساد مقاومت جبهې د رهبرۍ غړي حفیظ منصور له پاکستان سره فرضي کرښه، رسمي پوله مني او وایي، مونږ د افغانستان لپاره ټول سرحدونه محترم او نړۍوال بولو او په دې اړه هیڅ قانوني دعوه او اعتراض نلرو.
ډیورنډ کرښه د نړۍوال او رسمي سرحد منل د هغو ټولو افغانانو په سترګو کې خاورې شیندل دي، چې د دې جغرافیې د ساتلو لپاره یې خپلې ککرۍ شیندلې او دا وطن یې له انګرېز، چنګېز او امریکایانو څخه د وجود په ټوټه – ټوټه کولو ساتلی او په همدې کرښه یې د ژوند وروستۍ سلګۍ وهلي دي.
حفیظ منصور په ډېره سپین سترګۍ زیاتوي، چې موږ په افغانستان کې د پاکستان په مرسته د ځان او پاکستان لپاره جګړه کوو، تر څو د دواړو ګټې خوندي کړو. د شر او فساد لارویان څومره سپین سترګي دي! دوی نه یواځې دا چې افغاني او اسلامي ارزښتونه پلوري، برعکس د افغانانو په احساساتو ملنډې هم وهي او بیا بیرته خپله د پاکستان غلامي پر نورو ورتپي.
د شر او فساد عاملین تر نن ورځې د خپل مشر احمد شاه مسعود د لارې په تعقیب پسې روان دي. هغه د بدخشان یاقوت او زمرود چې د ټول ملت ګډه شتمني وه، پاکستان ته یې د هغوی چورلکې ترې ور ډکولې او یاد قیمتي کاڼي یې د لیلام په بیه پلورل. نن یې بچي پر هماغه پاکستان سلامته جغرافیه پلوري.
یوه نقطه چې باید له پامه ونه غورځول شي، چې د شر او فساد لارویانو په هر وخت کې د دې خاورې د پلورلو او تجزیه کولو هڅه کړې ده. له دې وړاندې د پاکستان آی ایس آی، له شر او فساد سره په ګډه د واخان د نا امنه کولو لپاره پلانونه او ګمارنې کړې وې، چې یو تن جاسوس یې نیول شوی هم دی؛ دغه کړنو له هر څه پرده پورته کړه، دوی دا چاره د افغانستان د بې ثباته کولو لپاره پر مخ وړله/ وړي.
د پرځېدلي جمهوریت، د هماغه وخت د ملي امنیت د رئیس رحمت الله نبیل لخوا هغه وخت هم د ډیورنډ فرضي کرښې پر سر د سودا کولو غږ اوچت کړ او یادونه یې کول، چې درې تنو ۱۷۰ میلیونه ډالر د یاد اغزن تار د تېرولو پر سر اخیستي دي.
د نبیل له څرګندونو وروسته د ننګرهار د هغه وخت والي شاه محمود میاخېل د ډیورنډ کرښې په اوږدو کې، د تورخم د رسمي افتتاح او دروازې د پرانستې لپاره په همدې موخه ور ولېږل شو، تر څو دغه کرښه د سرحد په پڼه قانوني حیثیت غوره کړي. نن هم د هماغه د بادار له غېږې د وطن د خرڅولو چیغي وهي.
موږ د افغانانو په حیث دا مسؤلیت لرو، چې دا مردود، قبیح او وطن پلورونکي خلک وپېژنو او پر وړاندې یې کلک ودرېږو، تر څو مو خپل الٰهي او ملي مسؤلیت اداء کړی وي او الله تعالی ته مو هم غاړه خلاصه کړې وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.