د سعودي عربستان د حج او عمرې وزير توفيق الربيعه پرون دوشنبه د سعودي په جدې ښار کې د حج او عمرې په اړه يوه کنفرانس ته په خبرو کې ويلي چې تېر ۲۰۲۴ کال د نړۍ د بېلابېلو هېوادونو له ۱۸.۵ ميليونه ډېرو وګړو حج او عمره ادا کړې ده.
ښاغلي الربيعه دغه راز کنفرانس ته په خبرو کې زياته کړې چې روان کال به د حج او عمرې په برخه کې ځينې اسانتياوې هم رامنځته کړي چې له ډلې یې مهم هغه له روضې مبارکې څخه د ليدونکو د شمېر زياتوالی، د کاري ځواک ډېرول، د ګڼې ګوڼې کمولو لپاره د مسلکي مديريتي سيستم پلي کول، او د انلاين خدمتونو پروسې ساده کول دي.
د سعودي د حج او عمرې وزير د حج په مراسمو کې ځينې رامنځته شوې ستونزې هم منلې دي او ډاډ یې ورکړی چې په ټول توان به یې د له منځه وړلو هڅه وکړي.