ملي دفاع وزارت د یوې خبرپاڼې په خپرولو سره ویلي چې، د حضرت ابو عبیده بن جراح ملي دفاع پوهنتون اړوند د حضرت معاذ بن جبل”رض” ملي پوځي اکاډمۍ څخه ٢٦٨ تنه ځوان افسران د څلور کلنې نظامي دورې له بشپړولو وروسته د یو لړ مراسمو په ترڅ کې فارغ شوي.
د خبرپاڼې له مخې، په یادو مراسمو کې د سرپرست حکومت د کابینې یو شمېر غړو، لوړ پوړو چارواکو، ګڼ شمېر مسؤلینو او منسوبینو ګډون کړی وو.
مسؤلینو نويو فارغانو ته په خپلو خبرو کې ویلي: «تاسې د هېواد مسلکي کدرونه یاست، در سپارل شوي مسؤلیت ته متوجه شئ او خپل مسؤلیت د مسلک په رڼا کې مخته یوسئ، کوښښ وکړئ چې د خپل هېواد د پرمختګ لپاره خپلې هڅې لا ګړندۍ کړئ؛ په ترلاسه شوو زده کړو بسنه مه کوئ لا نور هم په خپل مسلک کې پوهه ترلاسه کړئ ځکه د دې ملت تاسو ته سترګې دي او تاسو به د ملت زخمونو ته ملهم جوړیږئ».
د یادونې وړ ده چې، د سرپرست حکومت له حاکمیت وروسته د ملي وسلهوال ځواک د لا پیاوړتیا په موخه له ښوونیزو مرکزونو لسګونه زره سرتیري، بریدملان او افسران له مسلکي زده کړو فارغ او د پوځ لیکو ته جذب شوي دي.