د مقاومت جبهې د خپل منځي اختلافاتو په تړاو د هندوکش غږ وروستي خپاره شوي کلیپ په ډاګه کړې، چې د دغه ډلې په منځ کې د اختلافاتو له امله د شدید اخ و ډب مسایل رامنځ ته شوي او ترمنځ یې شته درزونه لا پراخ شوي.
د هندوکش غږ له خوا په خپاره شوي غږیز کلیپ کې چې د اکرام الدین سریع له خوا د جبهې بل غړي فضل الربي رحماني ته پکې سپکې سپورې ویل شوي او ګوت څنډنه شوې ده، په ایران کې د دغه ډلې د مېشتو غړو ترمنځ د شخصي رقابتونو یوه جدي نښه بللی شو.
په خپاره شوي غږیز کلیپ کې نه تنها د دغه ډلې د غړو ترمنځ شته شخصي رقابتونه بربنډ شوي، بلکې دا هم ښیي چې دغه ډله د خپل منځي ستونزو، بې باورۍ او واک پر سر شخړو له امله د لا پاشلتیا حالت ته رسېدلې ده.
د مقاومت جبهې د غړو ترمنځ دغسې اختلافات تر ډېره د دغه ډلې د مشرتابه د بې کفایتۍ ترڅنګ، د دغه ډلې په منځ کې له مشرتابه سره پر نه همغږۍ اطلاق کېږي؛ د مقاومت جبهې غړي د خپلې ډلې له اړخه شخصي اجنډاوې تعقیبوي او خپلو شومو موخو او خصومتونو پاللو ته لار هواروي.
د اکرام الدین سریع او فضل ربي ترمنځ ترسره شوې لانجه دا هم څرګندوي، چې د جبهې په منځ کې داخلي سیالۍ هم ورځ تر بلې په ډېرېدو دي.
یو شمېر سیاسي شنونکي د جبهې د روان وضعیت او شدیدو اختلافاتو په ارزولو سره په دې آند دي، چې دغه ډله په افغانستان کې د سرپرست حکومت د بدیل ځواک په توګه نشي وړاندې کېدلی او د خپلې پاشلتیا او ناکام مدیریت له امله یې ظاهري جوړه شوې تبلیغاتي بڼه هم د له منځه تللو په حال کې ده.
تر دې وړاندې هم د جبهې د یو شمېر غړو او مشرانو ترمنځ ورته ستونزې او شدید اختلافات رسنیز شوي، چې له امله یې نړۍوال او سیمهییز باور لا پسې بایللی دی.
څو ورځې وړاندې د محمد سمیر اندرابي په نوم د مقاومت جبهې یو فعال غړی چې له کلونو راهیسې یې له ایرانه د طالبانو پر ضد وسلوالې هڅې تنظیمولې، په شکمن حالت کې ومړ؛ د محمد سمیر اندرابي مړینه داسې مهال رامنځ ته شوه چې د مقاومت جبهې دننه ژورو اختلافاتو او بې باورۍ په چټکۍ سره رشد کړی او ښایي نوموړی هم د همدې اختلافاتو ښکار ګرځېدلی وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.