د پرځېدلي جمهوريت پر مهال د دفاع وزارت سرپرست وزير شاه محمود مياخېل د مخالفو جبهو او ډلو ټپلو تر منځ وروستیو ناندريو، کړکېچونو او په ځانګړي ډول له ملي مجمع څخه د مقاومت جبهې او جمعيت ګوند جلا کېدو ته په غبرګون کې د مخالفو جبهو مشران او غړي سياست مداران نه، بلکې ماشومان ياد کړي دي.
نوموړي ويلي، دوی د شګو کورونه جوړوي او بېرته یې ورانوي او دا کار د دوی اوسنۍ لوبه نه بلکې د دوی له قسم خوړلو مشرانو ورپاتې ده.
مياخېل زياته کړې «نه مقاومت ملي دی نه جبهه، دلته ائتلاف د شخصي ګټو او د نورو د اهدافو لپاره د وریژو مجمع ده کله چې وریژې په مجمع کې خلاصې شي، بیا د خالي مجمع شاوخوا څوک نه پاتې کیږي ځکه د دوی ائتلاف او مجمع په ملي ارزښتونو نه ده راټوله شوې».
ياده دې وي، چې د مقاومت په نوم خيالي جبهې او جمعيت ګوند د اعلاميو په خپرولو سره د افغانستان د ملي مجمع په نوم د مخالفو ډلو ټپلو له شورا څخه پرېکون اعلان کړ.