د سرپرست حکومت د ریاست الوزراء اقتصادي معاونیت وایي، ملا عبدالغني برادر نن له کجکي بند څخه د ارزګان ولایت دهراوود ولسوالۍ ته د برېښنا رسونې لویه پروژه پرانیستې.
د اقتصادي مرستیالۍ د خبر له مخې، ښاغلي برادر په همدې مناسبت جوړو شويو مراسمو ته ویلي چې، له پاکې انرژۍ څخه د ګټې اخیستنې دا ډول پروژې نه یوازې د اقلیمي بدلون پر وړاندې د افغانستان مقاومت زیاتوي، بلکې د نړیوال اقلیم په پاک ساتلو کې هم لازمه مرسته کوي.
ښاغلي برادر زیاته کړې چې، افغانستان له پخوا په وارداتي برېښنا متکي دی او د عوایدو زیات رقم د وارداتي برېښنا په مقابل کې ورکول کېږي، په داسې حال کې چې واردېدونکې برېښنا له یوه لوري قیمته او له بل لوري ډاډمنه سرچینه نه ګڼل کېږي.
د ریاستالوزراء اقتصادي مرستیال د پاکې انرژۍ ارزښت ته په اشارې ویلي چې، د برېښنا تولید دا ډول پروژې ارزانه سرچینې دي، د مضرو ګازونو د تولید مخه نیسي، د اقلیمي بدلون پر وړاندې مبارزه کې مرسته کوي، د برېښنا په برخه کې ثبات او پایداري رامنځته کوي، په هېواد کې د پانګونې مقدار، تولیدي ظرفیت او د استخدام کچه لوړوي، د اسعارو د وتلو مخه نیسي او د هېواد له اقتصادي ودې سره پام وړ مرسته کوي.
ښاغلي برادر، پر ملګرو ملتونو او د پاکې انرژۍ پر ملاتړ کوونکو نړیوالو سازمانونو د یو ګډ مسؤولیت له مخې غږ کړی، چې له افغانستان سره د پاکې انرژۍ د تولید په برخه کې لازمه همکاري ترسره او د نړیوالو سازمانونو له لوري متوقف شوې پروژې له سره پیل کړي.
د یادونې وړ ده، چې له کجکي بند څخه د ارزګان ولایت دهراوود ولسوالۍ ته د برېښنا رسونې دغه پروژه د افغانستان برېښنا شرکت په مالي ملاتړ د ۲۰۱ میلیون افغانیو په لګښت پلې کېږي، چې په بشپړېدو سره به یې شاوخوا ۴۵۰۰ کورنیو ته برېښنا برابره شي.