عدلیې وزارت نن په یوه خبرپاڼه کې ویلي، چې د کابل په پغمان ولسوالۍ کې د پرځېدلي جمهوريت پر مهال د پارلمان وکيل او د جمعيت ګوند د غړي ملا عزت له لوري په خپل ملا عزت نومي ښارګوټي کې غصب شوې ۳۵۲ جریبه ځمکه امارتي تثبيت او بیرته راوګرځول شوه.
خبرپاڼه زياتوي چې د ځمکو له غصب څخه د مخنیوي کمېسیون له دې وړاندې د کابل ولایت په پغمان ولسوالۍ کې د «ملا عزت ښارګوټي» څه باندې ۴۴۳ جریبه ځمکه بررسي کړې او د ځمکو له غصب څخه د مخنیوي او د غصب شوو ځمکو د استرداد قانون د ۱۷مې مادې له مخې یې دوسیه رسماً د امارتي غصب شوو ځمکو قضیو ته د رسېدنې اختصاصي محکمې ته سپارلې ده.
د یادونې وړ ده چې عدلیې وزارت د تېر ۱۴۰۳ کال په چنګاښ میاشت کې د پغمان ولسوالۍ په قرابل سیمه کې د «سردار محمد داوودخان ښارګوټي» ۵۵۶ جریبه ځمکه هم امارتي تثبیت کړې وه.