د ریاستالوزراء اقتصادي مرستیال ملا عبدالغني برادر اخوند تېره ورځ پنجشنبه (د غویي، ۲۵مه) د کازان ۱۶م نړیوال اقتصادي فورم په څنډه کې د موردوویا جمهوریت له ولسمشر ارتیوم الکسیویچ زدونوف سره کتلي.
د اقتصادي مرستیالۍ د خبر لهمخې، ښاغلي برادر د دې لیدنې پر مهال ویلي، چې افغانستان دا مهال په بېلابېلو سکټورونو کې د پانګونې له پاره زیات فرصتونه لري، بهرني پانګوال کولای شي په دغه سکټورونو کې پانګونه وکړي.
ښاغلي برادر زیاته کړې ده چې افغانستان د وچو او تازه مېوو، وطني غالیو، قېمتي ډبرو، مرمر او نورو کاني موادو باکیفیته تولیدات لري، چمتو دي چې په دې برخو کې موردوویا جمهوریت ته صادرات پیل کړي.
اقتصادي مرستیال وړاندې د موردوویا پانګوالو ته په افغانستان کې د صنعت، کانونو او کرنې په برخه کې د پانګونې بلنه ورکړې او هغوی ته یې د هر ډول همکارۍ او ملاتړ ډاډ ورکړی دی.
د ریاست الوزراء د اقتصادي مرستیالۍ د خبرپاڼې له مخې، د موردوویا ولسمشر ارتیوم الکسیویچ زدونوف دا لیدنه د دواړو هېوادونو ترمنځ د اقتصادي او سوداګریزو اړیکو د پيل او پراختیا لپاره ښه فرصت بللی او زیاته کړې یې ده، چې موردوویايي پانګوال د افغانستان په مارکېټ کې کار کولو ته چمتو دي.
نوموړي همداراز ویلي، چې هېواد یې د طب، کرنې، انرژۍ او درملو تولید په برخو کې ښه پرمختګونه لري او چمتو دي چې په یادو برخو کې له افغانستان سره ګډ کار وکړي.