د بهرنيو چارو وزارت سرپرست مولوي امير خان متقي د ایران په پلازمېنه تهران کې له خپل ایراني سیال، سيد عباس عراقچي سره په کتنه کې پر دوه اړخيزو اړيکو، امنيتي مسائلو، اوبو او د مهاجرينو په اړه خبرې کړې دي.
د بهرنيو چارو وزارت د عامه اړیکو رئیس حافظ ضیاء احمد تکل په یوه خبرپاڼه کې ویلي، چې ښاغلي متقي د دواړو هېوادونو اړيکې مهمې ګڼلي او په ګڼو برخو کې يې د همکاريو پراختيا ته په پام، د ديپلوماتيکو اړيکو د کچې لوړوالي اړتیا بللې ده.
ښاغلي متقي زیاته کړې، چې سرپرست حکومت افغان کډوالو ته په هېواد کې د بيامېشتېدو زمينه برابره کړې او له ايراني لوري يې غوښتي، چې د کډوالو په راګرځولو کې د تدريج اصل په پام کې ونيسي.
د خبرپاڼې له مخې، د ايران د بهرنيو چارو وزير د افغانستان او ایران دوه اړخیزې اړیکې مخ پر ودې بللي او زیاته کړې یې ده چې له ایرانه د افغان کډوالو بېرته تګ بايد تدريجي او باعزته وي.