مولوي ذبيح الله مجاهد پر خپله اېکس پاڼه ليکلي، چې د سرپرست حکومت د مشرتابه په حکم په تازه ټاکنو کې د لوګر ولایت مخکنی والي مولوي ضیاء الرحمن مدني د ارشاد، حج او اوقافو وزارت د مسلکي معین په توګه او د زابل ولایت مخکنی امنیه قومندان، قاري صلاح الدین ایوبي، د لوګر ولایت د والي په توګه ټاکل شوي.
په دغو ټاکنو کې همدا راز د سرحدونو، قومونو او قبائلو چارو وزارت د کوچیانو د سمون چارو مخکنی عمومي رئیس، مولوي ګل زرین، د کور او ښار جوړولو وزارت د مسکن، ساختماني چارو او زونونو د پراختیا د معین په توګه،د چارو ادارې لوی ریاست مخکنی مالي او اداري مرستیال مولوي محمود شاه زاهد، د امارتي شرکتونو د عمومي ریاست د پالیسۍ، څارنې او ارزونې د مرستیال په توګه او د کندهار ولایت د حکمونو او فرمانونو د تعقیب او نظارت ریاست مخکنی مرستیال مولوي سیدحسن شاه آغا، د چارو ادارې د لوی ریاست د مالي او اداري مرستیال په توګه ټاکل شوي.
په تازه ټاکنو کې همدا راز د کورنیو چارو وزارت مخکنی مشاور مولوي قدرت الله امیني، د کابل ولایت د والي د مرستیال په توګه او د کابل ولایت مخکنی مرستیال، ملا محمد یونس مخلص، د کورنیو چارو وزارت د مشاور په توګه ټاکل شوي.
د يادو شويو ټاکنو له مخې د خوست ولایت د ګربزو ولسوالۍ مخکنی ولسوال مولوي عبدالحلیم حلیمي، د زابل ولایت د امنیه قومندان په توګه او د ارزګان ولایت د استخباراتو مخکنی رئیس مولوي جمال الدین وهاج، د بغلان ولایت د امنیه قومندانۍ د امنیت د آمر په توګه ټاکل شوي دي.